Edi Rama po hyn në një nga momentet më delikate të mandatit të katërt. Të dielën në Pogradec ai mbledh 12 drejtuesit politikë të qarqeve dhe kryetarët socialistë të komisioneve parlamentare, ndërsa të hënën radha u vjen ministrave dhe drejtuesve të agjencive për të dhënë llogari për performancën e tetë muajve të parë të vitit.
Zyrtarisht në tryezë janë dokumenti “Besa”, “Prania e Besës”, puna e qeverisë dhe përgatitjet për zgjedhjet vendore të vitit 2027. Politikisht, megjithatë, Pogradeci duket shumë më tepër si parapërgatitja e një shtatori të nxehtë socialist.
Rama e di se 83 mandatet i japin një shumicë të fortë parlamentare, por nuk e mbrojnë qeverinë nga konsumimi. Pas 13 vitesh në pushtet, pakënaqësitë qytetare, protestat, goditjet e drejtësisë ndaj njerëzve të mazhorancës dhe zgjedhjet vendore që afrohen kërkojnë një reagim politik. Vazhdimi me të njëjtën fytyrë qeverisëse do të ishte një rrezik.
Prandaj “provimi” i ministrave në Pogradec duhet lexuar seriozisht. Rama nuk ka nevojë vetëm për raporte me shifra dhe prezencë në Facebook. Ka nevojë të kuptojë se cilët ministra prodhojnë rezultat, cilët kanë autoritet publik dhe cilët janë kthyer në barrë politike për PS-në.
Darka e së dielës mund të jetë e qetë, por mëngjesi politik i shtatorit mund të mos jetë i tillë për të gjithë.
Nëse Asambleja Kombëtare e PS-së mblidhet në fillim të shtatorit, historia e mbledhjeve të mëparshme tregon se Rama mund ta përdorë atë për të riformatuar kabinetin. Nëse do të ndryshojë gjashtë ministra apo më pak, mbetet për t’u parë. Por një gjë duket e qartë: Rama ka nevojë për një qeveri me fytyrë të re përpara betejës së vitit 2027.
Zgjedhjet vendore, dhe sidomos Tirana, do të jenë testi i parë i madh pas fitores së 83 mandateve. Nëse PS hyn në këtë betejë me ministra të konsumuar dhe me administratë të lodhur, mund ta paguajë shtrenjtë.
Pogradeci, pra, nuk është thjesht një “retreat” veror. Është tavolina ku Rama do të masë temperaturën e PS-së, ministrat dhe terrenin elektoral.
Dhe disa prej atyre që të dielën do të ulen në darkë me kryeministrin, mund të hyjnë në shtator pa karrigen që kanë sot. Edi Rama ka manifestuar vendime të forta sa herë e ka parë se ka nevojë për ndryshime. Rama ka sondazhe të sakta për nivelin e kuotave të PS dhe të çdo ministri dhe nuk flet me emocione por me fakte. Ndaj kryeministri do iu bëjë “zbor” ministrave dhe drejtuesve të Institucioneve qendore që varen nga qeveria.