Pas konfirmimit të rastit të parë me virusin e Nilit Perëndimor në Shqipëri, Instituti i Shëndetit Publik ka nisur hetimin epidemiologjik në qarkun e Korçës
Një grup specialistësh të ISHP-së nga Tirana ka mbërritur në terren për të kryer hetimin entomologjik dhe depistimin në vatër. Qëllimi është identifikimi i pranisë së mushkonjave që transmetojnë virusin, si dhe përcaktimi i masave të nevojshme për kontrollin dhe parandalimin e përhapjes së tij.
Rasti i konfirmuar i përket një 72-vjeçari nga Korça, i cili ndodhet aktualisht në Spitalin Rajonal të qytetit, ku po merr trajtimin mjekësor.
Sipas të dhënave paraprake, i moshuari jeton në qytetin e Korçës dhe dyshohet se është pickuar nga një mushkonjë gjatë qëndrimit në një lulishte, ku kalonte një pjesë të konsiderueshme të ditës. Pas shfaqjes së simptomave, ai iu drejtua spitalit dhe analizat laboratorike konfirmuan infektimin.
Specialistët po kryejnë kontrolle në zona të ndryshme të qarkut për të përcaktuar nëse mushkonja bartëse është e pranishme dhe sa është shtrirja e saj.
Në kuadër të masave parandaluese, po kryhet edhe depistimi në vatër, ndërsa në zonat ku identifikohet prania e mushkonjave mund të ndërhyhet me dezinfektim dhe trajtime specifike.
Ethet e Nilit Perëndimor transmetohen kryesisht përmes pickimit të mushkonjave të infektuara. Infeksioni shpesh mund të mos shkaktojë simptoma, ndërsa në raste të tjera mund të shfaqet me temperaturë, dhimbje koke, dhimbje muskujsh, të përziera dhe të vjella.
Në raste më të rënda, virusi mund të prekë sistemin nervor dhe të shkaktojë komplikacione serioze. Autoritetet shëndetësore vijojnë monitorimin në terren, ndërsa rezultatet e hetimit të ISHP-së pritet të ndihmojnë në përcaktimin e masave të mëtejshme për parandalimin e rasteve të reja.