Kreu i grupit parlamentar të PS-së, Taulant Balla, ka postuar foto në krah të kryeministrit pas fjalës të këtij të fundit në OKB, duke thënë se me Ramën, vendi ynë ka bërë hapa të rëndësishëm në forcimin e institucioneve, shtetin e së drejtës dhe luftën kundër korrupsionit. Sipas tij, lufta kundër korrupsionit bëhet përmes institucioneve dhe jo përmes “retorikës, sharjeve apo vezëve”. Balla shton se debatet politike nuk mund të ndalin rrugën europiane të Shqipërisë.
Postimi i plotë
Me Edi Rama Shqipëria është ngjitur në majën më të lartë të historisë së shtetit shqiptar. Sot Shqipëria nuk është më ajo e së shkuarës.
Transformimi i institucioneve, forcimi i shtetit të së drejtës dhe lufta kundër korrupsionit janë procese që kanë fituar vëmendje dhe vlerësim të shtuar nga partnerët tanë strategjikë, Bashkimi Europian dhe Shtetet e Bashkuara.
Përballë këtij realiteti të ri, vazhdojnë zhurma politike e mediatike dhe rikthehen shpresat e humbura të humbësve kronikë. Por lufta kundër korrupsionit nuk bëhet me retorikë, sharje apo vezë, por përmes institucioneve dhe një sistemi që po ndërtohet pikërisht për të garantuar më shumë transparencë, përgjegjshmëri dhe drejtësi. Ku seicili ka përgjegjësinë e tij civile, penale, morale. Kaq!
Koha e propagandës dhe e baltës politike nuk mund të ndalë rrugën tonë Europiane që tashmë ka hyrë në një fazë të re.