Ndërsa në Tiranë po zhvillohet dita e 15-të e protestës qytetare, një tubim paralel është mbajtur edhe në Gjermani, ku shqiptarë të diasporës janë mbledhur në Mynih duke shprehur mbështetje për lëvizjen.
Sipas raportimeve, qytetarët shqiptarë në Mynih kanë mbushur sheshet e qytetit, duke kërkuar dorëheqjen e kryeministrit Edi Rama dhe largimin e klasës aktuale politike në Shqipëri. Protestuesit kanë artikuluar thirrje në mbështetje të protestës që po zhvillohet në vend.
Gjatë tubimit është kënduar edhe kënga “Nuk ka si ty o Shqipëria ime”, e interpretuar në mënyrë kolektive nga pjesëmarrësit, si shprehje e emocioneve dhe lidhjes me vendin e origjinës.
Protesta në diasporë vjen paralelisht me zhvillimet në Tiranë, ku mijëra qytetarë janë mbledhur për të vijuar lëvizjen e tyre qytetare, e cila tashmë ka hyrë në ditën e 15-të radhazi.
Organizatorët e protestës e kanë cilësuar këtë periudhë si një nga lëvizjet më të qëndrueshme dhe më të gjera qytetare në vitet e fundit në Shqipëri, duke theksuar pjesëmarrjen e shtuar si brenda vendit ashtu edhe jashtë tij.
