Ish-deputeti i Partisë Demokratike, Ervin Salianji, i është bashkuar protestës së qytetarëve të mbajtur para Kryeministrisë, duke e cilësuar atë si një moment të rëndësishëm për shoqërinë shqiptare.
Në një reagim publik, Salianji u shpreh se protesta nuk përfaqëson thjesht një tubim qytetar, por është një mesazh i qartë se qytetarët kanë kapërcyer frikën dhe po kërkojnë ndryshim.
Sipas tij, bulevardi është shndërruar në një pikëtakim të të rinjve, profesionistëve, sipërmarrësve, intelektualëve dhe qytetarëve të zakonshëm, të bashkuar nga ideali për një Shqipëri me dinjitet, meritokraci, demokraci funksionale dhe institucione që u shërbejnë qytetarëve.
“Kur njerëzit humbasin frikën dhe fitojnë besimin tek forca e tyre, asnjë propagandë dhe asnjë makineri pushteti nuk mund ta ndalë ndryshimin. Bulevardi po flet dhe zëri i qytetarëve është më i fortë se çdo përpjekje për ta heshtur atë”, deklaroi Salianji.
Ai theksoi se pjesëmarrja e qytetarëve me bindje të ndryshme politike tregon, sipas tij, se kërkesa për ndryshim po tejkalon ndarjet partiake dhe po bashkon njerëzit rreth vlerave të demokracisë dhe shtetit të së drejtës.