Kryeministri Edi Rama ka folur në takimin e dytë të nivelit të lartë “Shqipëria2030 në BE – Ruga e Reformave”, ku theksoi edhe njëherë rëndësinë e integrimit të Shqipërisë në BE.
Kreu i qeverisë tha se vetëm në BE mund të garantohet liria jonë individuale dhe barazia para ligjit, pavarësisht se kush udhëheq në Tiranë.
“Doli një anketë për nivelin e mbështetjes së BE, brenda BE-së, nga ana e popujve që e përbejnë familjen europiane. Një anketë e cila publikohet që prej vitit 1983 dhe qysh prej atij viti, BE nuk ka qenë më popullor brenda perimetrit të vet, në këndvështrimin e popujve të vet, sesa aktualisht. Është një ndryshim dramatik i këndvështrimit popullor në BE, që natyrisht vjen si rezultat i faktit se çka ishte marrë deri para pak kohësh si e mirëqenë, nuk është më e mirëqenë. Për herë të parë në histori, një gjeneratë e tërë nuk ka parë një luftë. Ata janë vetëdijesuar se BE është edhe një perimetër sigurie, brenda të cilit vendet dhe popujt që e përbëjnë ndihen dhe duan të mbeten të pakërcënuar në të gjitha ato që kanë arritur dhe në lirinë e tyre individuale dhe në barazinë e tyre para ligjit. Patjetër pastaj edhe në të gjitha asetet e tjera që e bëjnë BE një krijesë të jashtëzakonshme politike. Për ne shqiptarët, ka qenë më e thjeshtë dhe mbetet më e thjeshtë, arsyeja e domosdoshmërisë e të qenit anëtarë të BE-së. Për ne shqiptarët të qenit anëtarë të BE-së, është të qenit përfundimisht të lirë nga hija e historisë sonë dhe të sigurt se liria jonë individuale dhe barazia para ligjit, nuk do jenë një atribut i lëvizshëm në varësi nga kush qeveris këtu në Tiranë”, tha Rama.
