Pas pothuajse një dekade në Elbasan është rikthyer programi social i strehimit “Subvencionimi i interesave të kredisë”, i njohur ndryshe si “kreditë e buta”.
Me gjithë kërkesat e shumta të qytetarëve Ministria e Ekonomisë, Kulturës dhe Inovacionit në shumë vite nuk kishte miratuar kuota për Elbasanin.
Tashmë programi rikthehet me shpresën e vijimësisë vit pas viti. Nënkryetarja e bashkisë së Elbasanit, Aulona Bylykbashi në një prononcim për Agjencinë Telegrafike Shqiptare sqaroi procedurat se si qytetarët mund të përfitojnë kredi të butë dhe kriteret për t’u shpallur fitues.
“Është hapur thirrja për të aplikuar nga të gjitha kategoritë e interesuara për programin e subvencionimit të interesave të kredisë, e njohur ndryshe si kredia e butë. Bashkia Elbasan ka dhe eksperienca të mëparshme. Më e afërta është ajo e vitit 2021, ku bashkia Elbasan shpalli rreth 180 kuota dhe ishin 154 aplikantë që u kualifikuan, të cilët më pas ndoqën procesin e tyre pranë bankave”, tha Bylykbashi.
Ky është një program në kuadër të thirrjeve për strehim, i cili realizohet në bashkëpunim me Ministrinë e Ekonomisë, Kulturës dhe Inovacionit.
“Bashkia Elbasan ka pasur edhe një thirrje në vitin 2012 dhe që atëherë nuk është praktikuar më si program, por jemi optimistë për hapjen këtë vit me 85 kuota dhe vijimësinë e programit”, theksoi Bylykbashi.
Për vitin 2025 janë miratuar 85 kuota për bashkinë e Elbasanit, ndërsa përfituesit duhet të plotësojnë disa kritere.
“Kriteret që duhen plotësuar janë disa dhe e gjithë procedura mund të aksesohet pranë zyrave të njësive apo në uebsajtin e bashkisë Elbasan. Kriteret kryesore janë çiftet e reja, personat që nuk kanë mbushur 40 vjeç, nënat kryefamiljare, familjet njëprindërore etj.”, vuri në dukje Bylykbashi.
Përveç kategorive sociale të përcaktuara, ekziston edhe kriteri ekonomik.
“Familjet që mund të aplikojnë janë ato që nuk kanë në pronësi një banesë, apo banesa e tyre është nën normat e strehimit. Po ashtu të ardhurat duhet të jenë brenda kufijve të përcaktuar”, tha Bylykbashi.
Programi “Subvencionimit të interesave të kredisë” ka në fokus përmirësimin e kushteve të jetesës së familjeve dhe çifteve të reja, të cilat nuk kanë aftësi ekonomike të përballojnë ofertën e tregut të lirë të banesave, ose atë të kredive hipotekore në treg.
Qëllimi i këtij projekti është mbështetja e familjeve dhe çifteve të reja në blerjen e shtëpive, me synim përmirësimin e kushteve të jetesës së tyre.
/k.s/a.f/r.e/ ATSH