Legjenda e futbollit italian, Gianluigi Buffon, sot shef i delegacionit të kombëtares “axurre”, ka folur hapur për të ardhmen e tij profesionale, për situatën te Juventusi dhe për drejtimin e futbollit italian. Ish-kapiteni i Italisë dhe Juventusi tha se ëndrra e tij e radhës është të bëhet drejtues sportiv, pa përjashtuar asnjë mundësi.
“Dua të provoj veten si drejtues sportiv. Nuk përjashtoj as Juventusin, as kombëtaren. Duhet të jem i hapur ndaj çdo mundësie që më jep futbolli,” u shpreh Buffon.
Buffon vlerësoi emërimin e Luciano Spallettit pas shkarkimit të Tudor, duke e cilësuar një zgjedhje të mençur për rikthimin e rezultateve: “Zgjedhja e Luciano-s mund të sjellë rezultatet që tifozët dhe klubi presin. Më vjen keq që nuk e pamë nga fillimi i sezonit, me përgatitjet dhe vendimet për lojtarët.”
Sa i përket shkarkimit të trajnerit kroat, Buffon tregoi një qëndrim të kujdesshëm: “Duket se ka pasur një mungesë empatie me drejtuesit. Kështu është raportuar, por të vërtetën e di vetëm ai që ka qenë brenda. Duke parë intervistat e fundit, veçanërisht atë pas ndeshjes me Como, kjo më krijoi përshtypjen e një distancimi të ndjeshëm.”
Për ndeshjen e ardhshme kundër Norvegjisë, ish-portieri legjendar e cilësoi si provë karakteri: “Sfida ka rëndësi për autoritetin tonë dhe për mënyrën se si do të përballemi me marsin.”
Në fund, Buffon foli për rëndësinë e trajnerëve që përshtaten me momentin historik të një klubi, duke përmendur edhe Massimiliano Allegrin te Milani: “Çdo periudhë ka nevojë për drejtuesit e duhur. Pas fazave të suksesshme vijnë momente të vështira, dhe ato kërkojnë njerëz që dinë të menaxhojnë presionin dhe grupin.”