Liga e Kampioneve rikthehet sot me sfidat e fazës “play-off”, një moment kyç i sezonit ku çdo gabim mund të kushtojë eliminimin. Me formatin që hyn në fazën vendimtare, presioni mbi skuadrat është maksimal dhe diferencat pritet të bëhen nga detajet.
Juventus në provë zjarri në Stamboll
Në orën 18:45, Juventus zbret në fushë për një transfertë shumë të vështirë ndaj Galatasaray. Bardhezinjtë vijnë pas humbjes ndaj Interit Milano në kampionat dhe synojnë të reagojnë me një rezultat pozitiv në Turqi.
Barazimi do të konsiderohej i pranueshëm për italianët, duke pasur parasysh forcën e Galatasarayt në shtëpi, ku skuadra turke ka rezultuar një kundërshtar i vështirë për çdo ekip.
Reali kërkon revanshin ndaj Benficës
Në orën 21:00 luhen tre sfida të tjera. Vëmendja kryesore është te përballja mes Real Madrid dhe Benfica. Dy skuadrat u ndeshën edhe në fundin e fazës së ligës, ku madrilenët u mposhtën 4-2 në Portugali. Tani “Los Blancos” synojnë hakmarrjen, me avantazhin se ndeshjen e kthimit do ta luajnë në “Santiago Bernabéu”.
Derbi francez në Paris
Një duel mjaft interesant pritet të jetë ai mes kampionëve në fuqi, Paris Saint-Germain dhe Monacos. PSG shihet si favorite në letër, por përballë ka një skuadër cilësore që mund të surprizojë. Fusha do të japë verdiktin final në këtë derbi francez.
Spektakël në Dortmund
Ndeshja tjetër e mbrëmjes do të zhvillohet në “Signal Iduna Park”, ku Borussia Dortmund pret Atalantën. Të dyja ekipet njihen për stilin ofensiv dhe po kalojnë një moment të mirë në kampionatet respektove, që e bën një duel të hapur.
