Pas fitores së marrë në transfertë ndaj Pizës fundjavën e kaluar, Juventusi dhe trajneri Luciano Spalletti nuk kanë ndërmend të ndalen. Në sfidën e radhës në “Allianz Stadium” ndaj Lecces, që luhet nesër në orën 18:00, bardhezinjtë synojnë fitoren e katërt radhazi në kampionat, për ta mbajtur sa më të gjallë garën për një vend në Champions League.
“Ndonëse periudha e festave ka sjellë disa vështirësi, lojtarët kanë punuar shumë mirë. I kam parë të përqendruar dhe pres të tregojnë të njëjtën vëmendje si në ndeshjet e fundit, duke shtuar edhe diçka më shumë në lojën tonë,” u shpreh Spalletti në konferencë.
Trajneri vlerësoi edhe kundërshtarin, duke theksuar se Leçja ka zhvilluar ndeshje cilësore dhe se Di Francesco është një trajner modern. Spalletti u ndal gjithashtu te kalendari i ngjeshur, duke nënvizuar rëndësinë e rotacionit dhe kontributit të stolit.
“Nuk jemi perfektë, por kemi ende hapësira për t’u përmirësuar. Në vitin e ri kemi detyrimin t’u japim kënaqësi tifozëve tanë, që meritojnë respekt maksimal,” përfundoi tekniku bardhezi.