Milanello po merr pamjen e një studioje MasterChef, ku trajneri Amorim, në varësi të emrave, i dërgon lojtarët në “ballkonatë”, i detyron të kalojnë “provën e presionit” ose u kërkon të dorëzojnë përparësen e bardhë, duke i larguar. Në qendrën sportive kuqezi, këto ditë po bëhen llogaritë për skuadrën që pas pak më shumë se një jave do të luajë ndeshjen e parë zyrtare. Për të arritur në këto përfundime, Gerry Cardinale është (ri)paraqitur në Carnago, për t’u takuar ballë për ballë me trajnerin e tij, me qëllim që të kuptojë thellësisht nevojat e tij dhe të ndajë emra e strategji. E gjithë kjo është shumë logjike dhe e arsyeshme, nëse nuk do të ishte fakti që koha po ngushtohet vërtet. Cardinale kishte qenë në Milanello më 23 korrik, por këtë herë ai mbërriti sërish me helikopter, ashtu si ditën e grumbullimit. Amorim, përveçse i ka bërë të ditur pronësisë nevojën për të sjellë nga tregu ende një qendërmbrojtës, një anësor dhe një mesfushor sulmues, i ka sqaruar numrit një të RedBird se kush nuk bën më pjesë në projekt.
Katër emra, në veçanti, janë jashtë projektit. Tre prej tyre janë tashmë të njohur: Tomori, Fofana, Odogu. I katërti është një surprizë e madhe sepse bëhet fjalë për Nkunku, një lojtar që në terma taktikë dukej i përshtatshëm për formacionin 3-4-2-1 të trajnerit portugez. Një emër që deri më tani nuk ishte përmendur kurrë si potencialisht në rrezik. Megjithatë, aventura e francezit me kuqezinjtë është destinuar të përfundojë këtu: nëse nuk do të mbërrijë një blerës i gatshëm të plotësojë kërkesat financiare të Milanit (për të shmangur një humbje, nevojiten rreth 28 milionë euro), ai do të largohet në huazim. Arsyet e refuzimit? Me sa duket, Christo nuk e ka bindur trajnerin për sa i përket lëvizjeve, dhe ndoshta as në stërvitje.
Në shikim të parë, pasoja natyrale e largimit të Nkunku do të ishte qëndrimi i Leao. Megjithatë, kujdes: ekuacioni nuk është aq i thjeshtë. Nga sa kuptohet, pozicioni i Rafës mbetet “sub iudice” (nën shqyrtim). Pra, nuk ka ndryshuar asgjë në krahasim me atë që kishte dalë në periudhën e fundit: ai, ndonëse vazhdon të shohë rreth e rrotull, do të dëshironte të qëndronte, por klubi ka nevojë të kuptojë nëse qëndrimi i tij do të përshtatej mirë me projektin. Pra, asgjë e përcaktuar dhe definitive. Nuk përjashtohet mundësia që edhe ai të largohet. Situata është padyshim e paqartë, me Rafën mund të ndodhë ende gjithçka. Në këtë drejtim, javën e ardhshme Cardinale pritet sërish në Milanello (përveçse do të jetë i pranishëm edhe në Torino për ndeshjen e parë të kampionatit), kur në rendin e ditës do të jenë bisedimet me lojtarët kryesorë të skuadrës. Ndër ta Maignan, Rabiot dhe, pikërisht, Leao. I cili ndërkohë, megjithatë, është ndalur për një shqetësim muskulor. Portugezi do të humbasë miqësoren me Manchester United dhe është në dyshim për debutimin me Torinon.
Trajneri dhe klubi kanë vendosur të mos thërrasin Nkunku, Tomori, Fofana dhe Odogu për ndeshjet e ardhshme – pra deri sa të jetë i hapur tregu i transferimeve – duke filluar nga miqësorja e fundit e Ferragostos me anglezët. Këta katër lojtarë, gjithashtu, që nga dita e djeshme stërviten veçmas dhe jo së bashku me shokët e skuadrës. Në listën e shitjeve të mundshme shfaqen edhe emrat e Estupinan, Gimenez dhe Filippo Terracciano, por për ta nuk janë marrë këto masa. Ndërkohë, në lidhje me shitjet, ka një të vitit të kaluar që e gëzon shumë Milanin: Reijnders është në prag të transferimit te Al-Qadsiah dhe një klauzolë në kontratën e lidhur mes Milanit dhe City-t thotë se nëse lojtari do të shitej këtë vit përfundimisht, City do të duhej t’i paguante Milanit të gjitha bonuset pavarësisht arritjes së tyre. Bëhet fjalë për plot 14 milionë euro. Milani, ndër të tjera, kishte arkëtuar rreth 5 milionë euro edhe nga kalimi i Tonalit nga Newcastle te Tottenham. Kur në verën e vitit 2023 mesfushori italian u transferua në Angli për 58.9 milionë euro, kuqezinjtë përfshinë një përqindje prej 10% mbi fitimin e një shitjeje të mundshme, të cilës i shtohet rreth një milion për kontributin e formimit. Newcastle më pas e shiti Tonali te Spurs për rreth 108 milionë euro: 10% e gati 50 milionë eurove diferencë, pra, i kanë shkuar “Djallit” këtë verë.
Marrë nga La Gazzetta dello Sport