Paris Saint-Germain ka zyrtarizuar transferimin e mesfushorit 18-vjeçar të Barcelonës, Dro Fernandez, një lëvizje që presidenti i klubit spanjoll e ka cilësuar si “të pakëndshme”. Sipas mediave spanjolle, PSG ka paguar 8.2 milionë euro (7.1 milionë funte) për Fernandezin, një shifër kjo më e lartë se klauzola e tij e lirimit prej 6 milionë eurosh (5.2 milionë funte), me qëllim ruajtjen e marrëdhënieve të mira mes dy klubeve gjigante.
Largimi i mesfushorit spanjoll ka shkaktuar polemika, pasi pritej që ai të nënshkruante një kontratë të re me Barcelonën. Megjithatë, Fernandez ka finalizuar tashmë kalimin e tij te PSG me një marrëveshje që zgjat deri në vitin 2030. Presidenti i Barçës, Joan Laporta, shprehu zhgënjimin e tij për Catalunya Radio, duke thënë: “Ka qenë një situatë e pakëndshme. Erdhi si një surprizë, sepse ne kishim rënë dakord për një zgjidhje tjetër kur ai të mbushte 18 vjeç. Çuditërisht, përfaqësuesi i tij na tha se nuk mund të zbatonte atë që kishim rënë dakord.”
Fernandez iu bashkua akademisë së famshme La Masia të Barcelonës në vitin 2022 dhe ka bërë pesë paraqitje me ekipin e parë që nga debutimi i tij në shtator, përfshirë edhe një ndeshje në Ligën e Kampionëve kundër Olympiacos. Nga ana e saj, PSG deklaroi se nënshkrimi ishte “plotësisht në përputhje me strategjinë sportive të klubit, e cila është thellësisht e fokusuar te rinia dhe talenti”. Vetë Fernandez e quajti lëvizjen e tij një “moment krenarie të madhe” dhe PSG-në “një klub masiv që e kam ndjekur që fëmijë dhe ku disa legjenda të mëdha kanë bërë histori”.
Në një postim të veçantë në Instagram, ai shkroi: “Pas gati katër sezoneve të paharrueshme, sot më duhet të marr një nga vendimet më të vështira të jetës sime: t’i them lamtumirë klubit që ka qenë shtëpia ime në vitet e fundit.” Këto fjalë theksojnë peshën emocionale të largimit të tij nga klubi katalanas.
Më herët gjatë këtij muaji, trajneri i Barçës, Hansi Flick, ishte pyetur për të ardhmen e Fernandezit dhe kishte theksuar se lojtarët e rinj duhet të “jetojnë për” klubin, duke sugjeruar se adoleshenti do të bënte një gabim nëse do të transferohej në Francë. “Ne u japim atyre mundësinë të stërviten me ne, të rriten, çdo ditë, me lojtarët më të mirë në botë. Ne u japim atyre mundësinë, u japim mbështetjen, besojmë tek ata, besimin,” tha Flick. Ai shtoi se “nëse dëshiron të luash për Barçën, atëherë [bëje] 100% me gjithë zemrën tënde. Këto ngjyra, duhet të jetosh për to, kjo është ajo që dua të shoh. Të gjithë të tjerët nuk i dua, kjo është ajo që mund të them.” Megjithatë, Flick pranoi gjithashtu se “ndonjëherë nuk je dakord me atë që bëjnë, por ata janë 18 vjeç, janë mjaftueshëm të rritur për të marrë vendime, kanë njerëz rreth tyre.”