Pas një gjysmë sezoni të ngjeshur në La Liga dhe Ligën e Kampionëve, Real Madridi ka gjetur mënyrën perfekte për të rikthyer atmosferën festive në stadiumin e tij legjendar. “Bernabeu” u shndërrua në një park argëtues dimëror, duke u kthyer në qendër të festimeve të Krishtlindjeve në kryeqytetin spanjoll.
Nga 23 deri më 31 dhjetor, stadiumi pret eventin “Mavidad”, një lojë fjalësh mes Madridit dhe “Navidad” (Krishtlindje në spanjisht), që transformon fushën e Bernabeut në një fshat përrallor të mbuluar me dëborë artificiale dhe aktivitete për të gjitha moshat.
Nëntë zona argëtimi janë të shpërndara në të gjithë stadiumin, ku vizitorët mund të gjejnë “Lumin Magjik” për patinazh mbi akull, një karusel festiv, treg ushqimi dhe aktivitete të ndryshme familjare. Atraksioni më emocionues mbetet një rrëshqitëse gjigante që nis nga tribunat dhe përfundon në fushë, duke ofruar një këndvështrim krejt të ri të “Bernabeut”.
Me këtë iniciativë, Real Madridi nuk e kufizon stadiumin vetëm tek futbolli. Klubi po e shndërron shtëpinë e tij historike në një pikë takimi për qytetarët dhe turistët, duke i dhënë një dimension të ri festave të fundvitit dhe duke e bërë “Bernabeun” një destinacion të veçantë për magjinë e Krishtlindjes.