Tottenham ka marrë një fitore shumë të rëndësishme në garën për mbijetesë, duke triumfuar 1-2 në fushën e Aston Villa, në javën e 35-të të Premier League.
Skuadra londineze e nisi ndeshjen në mënyrën më të mirë të mundshme, duke kaluar në avantazh që në minutën e 12-të me një supergol nga distanca të Conor Gallagher, i cili gjeti rrugën e rrjetës për herë të parë me fanellën e Tottenham pas transferimit të tij nga Atlético Madrid në merkaton e janarit.
Dominimi i miqve vijoi edhe më tej, teksa në minutën e 25-të Richarlison dyfishoi shifrat me një goditje të saktë me kokë, pas një krosimi të Mathys Tel. Pjesa e parë u mbyll me rezultatin 0-2 në favor të Tottenham.
Në fraksionin e dytë, Aston Villa u përpoq të reagojë dhe arriti të shënojë golin e vetëm në minutën e 90+6 me Emiliano Buendía, por pa arritur të shmangë humbjen.
Me këtë fitore, Tottenham ngjitet në vendin e 17-të me 37 pikë, duke marrë frymë në garën për mbijetesë, ndërsa Aston Villa mbetet në vendin e pestë me 58 pikë, në luftë për një vend në kompeticionet europiane.