Hidherimi ishte ndjenja dominuese në fjalët e Daniele De Rossit pas ndeshjes kundër Genoas. Një ndeshje që skuadra e tij dukej se e kishte interpretuar në mënyrën e duhur, por që i shpëtoi nga duart në minutën e fundit për shkak të një penalltie “bujare” të akorduar pas ndërhyrjes së Cornet ndaj Vergarës. Kjo e la trajnerin De Rossi me një përzierje krenarie për performancën e ekipit dhe zemërimi për vendimet arbitrare.
“Jam i kënaqur me performancën e djemve të mi, por dhënia e një penalltie të tillë të bën të humbasësh dashurinë për këtë sport. Na vjen shumë keq sepse bëmë një ndeshje të madhe kundër një skuadre të fortë, dhe ta shohësh atë të vendoset nga episode të tilla të dhemb,” theksoi De Rossi. Sipas tij, gabimi qëndron në thelb të rregullores: “Ky rregull është i gabuar, futbolli me të cilin isha mësuar funksiononte ndryshe.”
De Rossi shprehu habinë e tij për ndërhyrjen e VAR-it, duke thënë se nuk ishte një gabim i qartë. “Isha tifozi i parë i VAR-it, në kohën time do të më kishte shpëtuar nga disa ‘grabitje’. Po i japim një fuqi të rrezikshme, nuk ka kthim pas tani. Kontaktet do të ekzistojnë gjithmonë, do të gjejmë një lojë që do të ndryshojë dhe është për të ardhur keq për të gjithë. Jemi brenda kësaj dhe të gjithë do të pësojmë penallti të tilla.”
Në fund, De Rossi komentoi edhe gabimet mbrojtëse të Buongiorno-s, duke theksuar se “futbolli është i bërë nga gabime, pa to nuk do të kishte gola. Edhe dy golat e parë të Napolit erdhën nga moskujdeset tona.” Këto fjalë pasqyrojnë zhgënjimin e thellë të trajnerit për mënyrën se si u vendos rezultati i ndeshjes.