Marine Le Pen e pezullon nga partia, i ati: Skandaloze nëse ajo zgjidhet presidente e Francës

Themeluesi i Frontit Kombëtar në Francë, Jean-Marie Le Pen, ka kritikuar lideren aktuale të kësaj partie, Marine Le Pen, që është vajza e tij, pasi ajo e pezulloi atë nga anëtarësia në këtë parti të së djathtës ekstreme.

Gjatë një interviste në Radion Franceze, Le Pen, 86 vjeç, tha se do të ishte “skandaloze” nëse vajza e tij, Marine Le Pen, zgjidhet presidente e Francës, raporton REL.

Pezullimi Le Pen nga partia është shpallur dje, pasi ai kishte bërë komente se dhomat naziste të gazit gjatë Holokaustit në Luftën e Dytë Botërore, ishin thjesht gjëra të parëndësishme.

Marine Le Pen po përpiqet ta distancojë vetveten dhe partinë nga imazhi racist dhe antisemit, pasi përgatitet për t’u kandiduar në zgjedhjet e ardhshme presidenciale në Francë.

Babai i saj tha sot se pezullimi i tij dhe rreziku që ta humbë titullin e kryetarit të nderit të partisë, paraqet “tradhti” dhe ai tani nuk dëshiron që ta shoh fitoren eventuale të vajzës së tij në zgjedhjet presidenciale të vitit 2017.