Presidenti Meta: Mirënjohje Studentëve në Ditën Kombëtare të Rinisë

Presidenti i Shqipërisë, Ilir Meta, në mesazhin e parë në Ditën e Rinisë, ka shprehur mirënjohje për studentët. Kreu i Shtetit, ka rikujtuar jehonën e thirrjeve të studentëve të vitit 1990, që përkon me thirrjet e studentëve të 2018. ”Jehona e thirrjeve “Liri-Demokraci” dhe e ”E duam Shqipërinë si gjithë Europa” të 8 dhjetorit 1990 është ende një aspiratë, jo plotësisht e realizuar”. Siç shkruan edhe në postimin në rrjetin social facebook, për rininë e sotme, veçanërisht për studentët që me protestën e tyre hodhën themelet e një ”Dhjetori të Dytë”, Presidenti Meta i mbështet për guximin dhe kurajon.

Mesazhi i plotë i Presidentit Ilir Meta

Inkurajoj dhe mbështes rininë e sotme, veçanërisht studentët, të cilët me shpirtin e tyre të lirë, energjinë, guximin e kurajon e pashembullt të marrin aktivisht pjesë në proceset demokratike për europianizimin e plotë të vendit dhe për ndërtimin e një të ardhmeje të sigurtë të tyre në Shqipëri.

Mirënjohje të gjithë studentëve, të rejave e të rinjve, të cilët 28 vite më parë vërshuan në rrugët dhe sheshet e Tiranës, me thirrjen që kumbonte nga gjokset e tyre rinore “E duam Shqipërinë si gjithë Europa” dhe “Liri-Demokraci”, për të shndërruar 8 Dhjetorin në Ditën e tyre, Ditën e Rinisë, Ditën e Lirisë, Ditën e Europës.

Kujtojmë me nderim veprën e Azem Hajdarit, liderit të Lëvizjes Studentore, i cili me guxim, kurajo e shpirt sakrifice frymëzoi ato minuta e orë vendimtare për mijëra studentë, të rinj, pedagogë e intelektualë, për të kthyer në Shqipëri lirinë e munguar.

Jehona e thirrjeve “Liri-Demokraci” dhe e “E duam Shqipërinë si gjithë Europa” të 8 dhjetorit 1990 është ende një aspiratë, jo plotësisht e realizuar.

Inkurajoj dhe mbështes rininë e sotme, veçanërisht studentët, të cilët me shpirtin e tyre të lirë, energjinë, guximin e kurajon e pashembullt të marrin aktivisht pjesë në proceset demokratike për europianizimin e plotë të vendit dhe për ndërtimin e një të ardhmeje të sigurtë të tyre në Shqipëri.