Meta në zonat e thella malore të Tropojës, përuron rrugën e re Lekbibaj-Curraj i Epërm

Presidenti i Republikës, Ilir Meta gjatë vizitës në Tropojë ishte i pranishëm në përurimin e rrugës së re që lidh Lekbibaj me Curraj i Epërm.

Presidenti Meta uroi banorët e zonës dhe vlerësoi investimin e bërë me kontributet e vetë banorëve si një mbështetje për një nga fshatrat më të bukur të Alpeve Shqiptare, që ka pasuri të rralla natyrore dhe theksoi rëndësinë e zhvillimit të turizmit malor e të sporteve të ndryshme si ecja sportive, alpinizmi, sidomos për brezin e ri.

Gjithashtu, Presidenti i Republikës ishte i pranishëm edhe në meshën e së dielës, e cila u mbajt në Kishën katolike të fshatit “Curraj i Epërm”, duke u takuar e përshëndetur me banorët e shumtë të zonës, me të cilët ndoqi edhe një koncert artistik.

Në fjalën e tij Presidenti Meta, u shpreh: “Ndihem shumë i lumtur të jem këtu në Curraj të Epërm, në Nikaj- Mërtur, në Tropojën epike.

Jetojmë në kohë të vështira, kur globalizimi, komercializimi po godasin disa vlera të rëndësishme të familjes, të atdheut, të kombit dhe ne si një vend i vogël jemi të rrezikuar në rast se nuk i kushtojmë rëndësi të madhe këtyre vlerave. Kjo vepër është rikthimi i të gjithëve ju me shumë dashuri e krenari në vendin tuaj e të parëve tuaj. Është një mesazh i fortë atdhedashurie, por njëkohësisht edhe rimëkëmbjeje.”

Duke falënderuar edhe kryetarin e Bashkisë Tropojë, Besnik Dushaj për punën, angazhimin si edhe frymën e bashkëpunimit me institucionet, Ipeshkvin Simon Kulli për meshën dhe mesazhet pozitive, dhe të gjithë kontribuuesit dhe dhuruesit e tjerë brenda e jashtë vendit për rrugën e përuruar, Presidenti i Republikës vuri në dukje se: “kjo vepër e jashtëzakonshme është një investim tepër bujar, patriotik e njerëzor i vetë banorëve të kësaj zone, duke u dhënë një mësim përfaqësuesve të institucioneve, që shteti duhet të bëjë më shumë.”

Duke përmendur edhe rëndësinë e turizmit Presidenti Meta vlerësoi dhe u shprehu mirënjohjen turistëve, sidomos të rinjve, të cilët me mesazhin e tyre të fortë në media, kanë theksuar se Shqipëria është një vend me një bukuri të rrallë natyrore, e pacenuar dhe e padëmtuar, ku ia vlen të vish për turizëm malor, për ngjitje dhe alpinizëm, për “turizmin e aventurës”, duke promovuar sidomos ardhjen në Curraj të Epërm.

“Do të bashkëpunoj shumë më ngushtë edhe me kryetarin e Bashkisë, me administratorin, me deputetin, e me të gjithë ju, në mënyrë që t’i zgjidhim hap pas hapi të gjitha problemet që ka kjo zonë, që kjo rrugë të jetë e standardeve të duhura dhe njëkohësisht të zgjidhim problemet e telefonisë e të komunikimit, të energjisë e shumë çështje të tjera, të cilat do të bëjnë të mundur që sikurse u hap kjo rrugë, të hapen edhe këto shtëpi e të mirëmbahen. Që këtu të kemi më shumë bujtina e më tepër turizëm, të ardhura, e më shumë fëmijë. Kjo është shumë e rëndësishme!”

“Një gjë mund ta them me bindje se nuk ka vend më të bukur se sa Shqipëria. Bjeshkët e Nëmura dhe Currajt e Epërm do t’i kishte zili çdo vend i zhvilluar në botë. Ne i kemi e duhet t‘i ruajmë si sytë e ballit!

Të ruhet ky peizazh, këto tipare karakteristike të kësaj zone! Të ruajmë traditat! Të ruajmë këngën dhe vallen tropojane!” – ishin mesazhet e Kreut të Shtetit, i cili premtoi se do të rikthehej me shumë kënaqësi për vizita të tjera në të ardhmen në këto zona.