Nga Thoma Goga-
Prej datës 24 -28 korrik 2018, banorët e Bashkisë Roskovec përjetuan një event maraton- “Ditët e Kulturës”, organizuar nën kujdesin e drejtpërdrejt të kryetares znj. Majlinda BUFI. Këto veprimtari u zhvilluan në kuadër të 95 vjetorit të Njësisë Administrative Roskovec.
Dita e parë iu kushtua talenteve të rinj në letrërsi, art, sport.
Kurse dita e dytë promovoi shkrimtarët me origjinë nga Roskoveci, të njohur në arenën mbarëkombëtare. Kopertinat e librave të tyre u shpalosën ditën e fundit në rrugët e qytetit, bashkë më fotot artistike të pikave turistike.
Dita e tretë promovoi artistët roskovecarë që kanë lënë gjurmë të arta në vitet 70-80. Në gjurmë të tyre u ngrit e shpërtheu grupi i ri “Bilbilat e Roskovecit”.
Dita e katërt promovoi personalitetet që janë dekoruar ndër vite me titullin “Qytetar Nderi” si dhe ata që kanë merituar titullin “Njeriu i vitit”
Dita e fundit ishte në dispozicion për të promovuar figurat që kanë qënë deputetë, kryetar komune, ose kryetar Bashkie.
Çdo natë kishte një koncert gala të kombinuar me elementet promovues. Grupi artistik i fëmijëve që ka përgatitur mësuesja e talentuar Mimoza Xhindi treguan se kultura dhe arti në Roskovec po rrit një brez që do të trashëgojë historinë e paraardhësve të tyre.
Është momenti të përmend këngëtarë të njohur edhe në arenën ndërkombëtare si Petrit Lulo, Silva Gunbadhi, Parodistët e Vlorës, Endri e Stefi Prifti, Luiziana, por edhe këngëtarë që kanë dalë nga treva jonë si Gramoz Velmishi, Ylli Dardha, Arbër Pelo etj.etj. Interesimi i banorëve rritej çdo natë.
Në të gjitha ditët dhe netët ngjiteshin në skenë këngëtarë dhe aktorë profesionistë, u promovuan dhe talentet e rinj siç ishte grupi teatror që shfaqi komedinë “I sëmuri për mend” përgatitur nga Miola Sitaj, aktore e njohur e teatrit “Bylis”. Ndërsa në mbrëmjen e fundit u shfaq komedia tjetër “Zi e më zi” nga trupa e teatrit Bylis”.
Në 5 netët maratonë sheshi kryesor dhe rrugët e qytetit gumëzhinin deri në mesnatë. Shumë mesazhe falenderimi nga qytetarët na e hiqin lodhjen si me dorë. Fryma e grupit, bashkëpunimi i çdo strukture dhe motivimi që na jepte kryetarja e Bashkisë znj. Majlinda BUFI, sollën atë që quhet – SUKSES…