Krishtlindje në një bunker ushtarak

Është ndërtuar në fillim të shekullit të XX si fortesë për të mbrojtur brigjet e Anglisë nga një sulm i mundshëm ushtarak detar dhe i shërbeu këtij objektivi në të dyja luftërat botërore e më pas u mirëmbajt gjatë Luftës së Ftohtë. Sot dy luftërat botërore dhe ‘armiqësitë’ me Lindjen nuk janë në një gradë të tillë që të justifikojnë mbajtjen e ‘Spitbank Fort’, fortesë ushtarake në brigjet e Portsmuthit, ndaj u mendua transformimi i saj. 3 milion paund u hodhën në këtë fortesë detare për ta shndërruar në një resort më tepër se luksoz. Fortesa është sot një hotel i vërtetë në gjendje që të rehatojë në mënyrën më të mirë të mundshme 18 persona. Oferta e Krishtlindjeve është 12 mijë paund për person për këdo që dëshiron të kalojë atmosferën festive në këtë objekt të veçantë.