Ajo quhej Lejdi Bet Dagllas dhe ishte një gjeni. Por brenda pak muajsh, vajza adoleshente e Markezës së Kuinsberrit gjeti vdekjen e parakohshme për shkak të një helmimi me heroinë dhe kokainë.
Lejdi Bet vdiq teksa po gdhihej 7 marsi i këtij viti, pasi kishte festuar në një nga zonat më ekskluzive të Londrës.
Ajo ishte e njohur tashmë për varësinë ndaj drogës. Dëshmitarët thanë se kanë parë dy trafikantë, një burrë dhe një grua, me pamje latine, të vinin tek apartamenti ku bëhej festa me një sasi të madhe narkotikësh. Lejdi Bet, tashmë 18 vjeç, do të injektonte një shiringë në venat e krahut të djathtë.
Ajo u shemb në një divan të pistë dhe të tjerët menduan se po flinte gjumë. Kur i dashuri i saj, Jenan Herzog Karagoli, u kthye nga lokali ku po blinte verë, e kuptoi se ajo nuk do zgjohej më.
Një vajzë plot jetë, që dy vite më parë ishte cilësuar si një talent për violinë, nxënëse në një nga shkollat më të mira muzikore në Britani, kishte ndërruar jetë. Për muaj me radhë ajo ishte nën varësinë e drogës, ndërkohë që aristokraten e njohur me emrin Ling-Ling, e tallnin online duke i thënë se prostituonte për të fituar paratë për drogën.
Megjithëse ajo vdiq në një apartament të njohur për përdorim droge të klasit A, askush nuk u dënua. Babai i saj, Markezi, u ankua se policia nuk arrestoi askënd, edhe pse prona njihej për shpërndarje dhe marrje drogërash.
Nipi i Lejdi Bet thotë se është i shokuar, pasi ajo vërtet merrte kokainë, por atë natë mori heroinë, që i solli edhe arrestin kardiak.
“Askush që e provon heroinën për herë të parë, nuk e bën vetë- dikush do e ketë ndihmuar. Por policia nuk duket e shqetësuar për këtë,” thotë Hiro Dagllas.
Disa akuzojnë edhe autoritetet e shëndetit mendor, të cilët e kishin trajtuar vajzën për anoreksi, çrregullime bipolare dhe çrregullime të personalitetit dhe sërish e kishin lejuar të kalonte vlerësimin mendor një muaj para vdekjes.
Të tjerë akuzojnë rrjetin social, Twitter që e lehtësoi ‘rrëshqitjen’ e saj në prostitucion.
Por më besimtarët thonë se ky është vazhdimi i mallkimit të familjes aristokrate Kuinsberri.
Markezi i 9-të ishtë një Viktorian i njohur, që i dha emrin familjes. Ai ishte babai i Lordit Alfred Dagllas, i dashuri homoseksual që solli rënien e Oskar Uajlld.
Vajza e Sër Dejvid është martuar me një grabitës të armatosur, me të cilin ishte njohur kur punonte në burg. Martesa dështoi.
Një nga motrat e Sër Dejvid u martua jo me një, por me dy djemtë e Osama bin Laden.
Kurse për Lejdi Bet, gjithçka nisi në fillim të viteve ’90, kur mamaja e saj, një tajvaneze e re, erdhi për të studiuar art në Angli. Atje u njoh me karizmatikun, Markezin e Kuinsberrit, Sër Dejvid Dagllas. Ai po i afrohej të ’70-ave dhe kishte lënë pas dy martesa nga të cilat kishte gjashtë fëmijë, plus një të shtatë të lindur nga një aferë jashtëmartëesore.
Të dy ranë në dashuri dhe Lejdi Bet lindi në vitin 1999. Një vit më vonë ata u martuan. Ai ishte 72 dhe ajo 31 vjeç. Lejdi Bet u rrit në shtëpi shumë të rehatshme, por në një familje shumë jofunksionale.
Që kur ishte 13 vjeç, ishte e njohur për shërbimet e shëndetit mendor për tendencat që t’i bënte dëm vetes. Kur ishte 14 vjeç, shkoi në një ekspozitë, ku u takua me një të moshuar që abuzoi seksualisht me të. Prej atëherë nuk e mori më veten.
