Kryeministri Edi Rama ka folur për të ardhmen e tij politike pas përfundimit të drejtimit të qeverisë dhe Partisë Socialiste, duke bërë të qartë se nuk ka ndërmend të përcaktojë pasardhësin e tij në krye të PS-së. Në një intervistë për podkastin “Flasim Shqip”, Rama tha se gara për drejtimin e Partisë Socialiste do të hapet në momentin e duhur dhe se çdo kandidat duhet të ndërtojë vetë karrierën dhe profilin e tij politik.
“Unë personalisht s’kam ndërmend të zgjedh pasardhës. Pasardhësi ose pasardhësja, kushdo që të jetë, le të dalë të marrë përsipër PS-në”, u shpreh Rama. Ai shtoi se anëtarëve të Partisë Socialiste u ka bërë thirrje që të mos mendojnë se kujt do t’i vijë radha, por të fokusohen te puna dhe karriera e tyre politike. “Mos mendoni se kujt i vjen radha, sepse s’është hapur gara, por bëjini yzmetin karrierës suaj dhe figurës suaj duke bërë detyrën tuaj”, tha kryeministri.
Rama theksoi gjithashtu se edhe pas largimit nga drejtimi i PS-së, nuk ka ndërmend të largohet nga partia. Ai tha se do të mbetet anëtar i saj, por pa marrë një funksion drejtues. “Unë nuk do lë PS-në, do jem anëtar i organizatës së Surrelit dhe do rri atje, jo kryetar organizate. S’kam ndërmend t’i ngatërrohem nëpër këmbë kush do jetë më mbrapa meje”, deklaroi Rama.
I pyetur nëse e sheh veten në një tjetër funksion shtetëror pas përfundimit të mandatit, konkretisht në postin e Presidentit të Republikës, Rama la të hapur dëshirën për t’u marrë me angazhime të tjera, por tha se aktualisht prioriteti i tij është përfundimi i mandatit dhe objektivave të qeverisë.
“Po pse unë s’di të bëj punë të tjera?! Unë mezi pres të bëj punë të tjera”, u shpreh ai. “S’mundem ta lë detyrën pa mbaruar këtë kontratë dhe këtë kontratë e kërkova sepse shoh derën e BE-së hapur. Vetëm me PS-në mund të kapërcehet kjo derë”, tha kryeministri.