Ka vijuar sot dita e dytë e konferencës “Zbatimi i Kontratës Klimatike të Qytetit” në Elbasan, ku pas diskutimeve të një dite më parë mbi vizionin e qytetit për vitin 2030, fokusi është zhvendosur tek mundësitë konkrete për investime, mekanizmat financiarë të qëndrueshëm dhe ndërtimi i partneriteteve të forta.
Në fjalën e tij përpara përfaqësuesve të Komisionit Europian, partnerëve ndërkombëtarë dhe qytetarëve, kryebashkiaku i Elbasanit, Gledian Llatja, theksoi se transformimi drejt një qyteti klimatikisht neutral nuk është vetëm një sfidë mjedisore, por një projekt i madh zhvillimi ekonomik dhe social.
“Ky transformim kërkon mobilizim të burimeve financiare, koordinim të instrumenteve kombëtare dhe europiane, si dhe besim nga investitorët dhe partnerët. Financimi nuk është thjesht çështje fondesh, por çështje besueshmërie, kapacitetesh dhe vizioni të përbashkët”, u shpreh Llatja.
Ai nënvizoi se diskutimet e ditës së dytë janë vendimtare për të krijuar një bazë të qëndrueshme investimesh dhe për ta shtrirë modelin e kontratës klimatike edhe në qytete të tjera të vendit, duke e kthyer tranzicionin e gjelbër në një prioritet kombëtar.
Një pjesë e rëndësishme e fjalës së tij iu kushtua transformimit të zonës së Metalurgjikut, e konsideruar si një pol strategjik zhvillimi për qytetin.
“Kjo zonë mbart një identitet të fortë social dhe ekonomik për Elbasanin. Sot kemi rreth 130 biznese të vogla dhe të mëdha që operojnë aty, me rreth 3000 të punësuar. Për ne, kjo është një ekonomi shumë e rëndësishme, por synimi ynë është që ajo të zhvillohet në harmoni me mjedisin dhe cilësinë e jetës së qytetarëve”, tha kryebashkiaku.
Sipas tij, bashkia synon të punojë ngushtë me bizneset e zonës industriale për t’i orientuar drejt praktikave më miqësore me mjedisin, një proces që ka nisur që në hapat e parë të hartimit të kontratës klimatike.
“Ne duam që këto biznese të jenë në funksion të zhvillimit të qëndrueshëm të qytetit, duke ndërvepruar jo vetëm me ekonominë lokale, por edhe me atë kombëtare”, shtoi Llatja.
Konferenca pritet të shërbejë si një platformë konkrete për ndërtimin e mekanizmave të rinj financiarë dhe për forcimin e bashkëpunimit mes pushtetit vendor, biznesit dhe partnerëve ndërkombëtarë, në funksion të një modeli të qëndrueshëm zhvillimi për Elbasanin dhe më gjerë.