Ministri për Evropën dhe Punët e Jashtme, Ferit Hoxha, mori pjesë në takimin e 3-të të Platformës së Paqes për Ballkanin, me ftesë të homologut turk, Hakan Fidan.
Forcimi i bashkëpunimit rajonal, perspektiva e integrimit evropian, zhvillimi ekonomik dhe siguria energjetike ishin temat kryesore të diskutimit.
Ministrat theksuan rëndësinë e dialogut dhe besimit për paqen dhe stabilitetin në rajon, si dhe riafirmuan vizionin për një Ballkan Perëndimor më të integruar dhe të orientuar drejt së ardhmes.
Ministri për Evropën dhe Punët e Jashtme, postoi dhe një shkrim në rrjetet sociale pas takimit me homologen letoneze:
Ishte një kënaqësi e veçantë të takohesha me homologen time letoneze, Baiba Braže, në kuadër të Forumit Diplomatik të Antalias 2026. 🇦🇱🇱🇻
Gjatë bisedës rikonfirmuam angazhimin e përbashkët për forcimin e mëtejshëm të bashkëpunimit dypalësh në fusha kyçe me interes të ndërsjellë.
Shpreha mirënjohjen time për mbështetjen e vazhdueshme dhe të vyer që Letonia i ka dhënë Shqipërisë në rrugëtimin e saj drejt anëtarësimit në Bashkimin Evropian, një prioritet strategjik për vendin tonë.
Gjithashtu, vlerësuam partneritetin tonë të fortë në kuadër të NATO-s dhe nevojën për të qenë të përgatitur për t’ju përgjigjur një mjedisi sigurie gjithnjë e më kompleks dhe dinamik. Në këtë kontekst, theksuam edhe kontributin e trupave shqiptare në Ādaži, si një dëshmi konkrete e përkushtimit tonë të përbashkët ndaj mbrojtjes dhe sigurisë kolektive.
Ishte kënaqësi të ripërsërisja ftesën për një vizitë në Tiranë, me synimin për të forcuar më tej lidhjet mes vendeve tona dhe për të thelluar bashkëpunimin dypalësh.
