Opozita lidh dy hetime të mëdha me kryeministrin, Bardhi: Rama po bën kurban integrimin në BE

Kreu i grupit parlamenar të PD-së, Gazment Bardhi ka ngritur akuza të forta ndaj kryeministrit Edi Rama, duke e lidhur atë me dy çështje të fundit të hetuara nga SPAK. Sipas Bardhit, bëhet fjalë për raste që përfshijnë ministren Belinda Balluku dhe drejtoreshën e AKSHI, Mirlinda Karçanaj. Ai pretendon se të dyja rastet kanë lidhje të drejtpërdrejta me familjen e kryeministrit dhe kështu po bëhet kurban Integrimi në BE. Bardhi akuzon Ramën se ka mbrojtur publikisht Karçanajn, duke e paraqitur si viktimë të hetimeve, ndërkohë që sipas tij ka qenë në dijeni të aferave të pretenduara financiare që lidhen me institucionin që ajo drejton.

Postimi i plotë

Ka dy raste të rënda korrupsioni brenda 6 muajsh, kur kryeministri ka dalë garant publikisht për dy të pandehura nga SPAK. Njëra është Belinda Balluku, tjetra është Mirlinda Karçanaj e AKSHI-t. Të dy rastet kanë një të përbashkët: të çojnë tek familja Rama. Njëra tek vetë Edi Rama, tjetra tek bashkëshortja e tij.

Prandaj edhe mbrojtja e tyre, me çdo mjet, nuk është rastësi. Kur e paraqiti Lindën e AKSHI-t si viktimë të SPAK-ut, që jetonte me qira dhe gati sa nuk tha se nuk e mbyllte dot muajin me rrogën e qeverisë, Edi Rama i dinte aferat qindra milionëshe të AKSHI-t. Minimalisht, e dinte sa tendera merr baxhanaku i tij nga AKSHI. Ose sa herë ishte shpallur fitues koordinatori i tij personal me krimin e organizuar, Ergys Agasi.

Tani që SPAK ka sekuestruar pasuritë e tyre me vlerë 40 milionë euro dhe që dimë se Linda e AKSHI-t kishte shtëpi në disa resorte luksoze, Edi Rama ka detyrimin të dalë publikisht dhe të kërkojë ndjesë për mbrojtjen e saj publike dhe mashtrimin e shqiptarëve. E di që po kërkoj të pamundurën, por ky është standardi minimal europian, me të cilin Edi Rama nuk ka asnjë lidhje.

Për këto dy megaafera, ku lidhet vetë direkt, Edi Rama ka bërë kurban integrimin e Shqipërisë në Bashkimin Europian. Sot që flasim, jemi të paktën 6 muaj vonesë me ecurinë e negociatave. Ka ardhur koha që faturën ta paguajë Edi Rama!