Pas 6 orë debatesh, Komisioni i Ligjeve miratoi me votat e maxhorancës projektligjin për pagat e magjistratëve, duke ia kaluar atë Kuvendit për votim në seancën e së enjtes, ku kërkohen 84 vota.
Debati u shoqërua me përplasje mes maxhorancës dhe përfaqësuesve të sistemit të drejtësisë, pasi KLGJ dhe KLP kishin vendosur më herët rritjen e pagave të magjistratëve me rreth 43%, duke iu referuar një vendimi të Gjykatës Kushtetuese.
Kreu i Shoqatës së Gjyqtarëve, Engert Pëllumbi, kundërshtoi projektligjin dhe e cilësoi rritjen prej 2% si “tallje” me magjistratët. Edhe drejtues të tjerë të institucioneve të drejtësisë, përfshirë KLP dhe Gjykatën e Lartë, e konsideruan formulën e propozuar të pamjaftueshme dhe jo në përputhje me standardet e Gjykatës Kushtetuese.
Në përfundim, kryetari i Unionit të Gjyqtarëve, Gert Hoxha, la të hapur mundësinë e dialogut me qeverinë, por kërkoi një ftesë serioze dhe zhvillimin e bisedimeve në një ambient neutral.