Kreu i PD, Sali Berisha ka reaguar lidhur me takimin e kryeministrit Edi Rama me shqiptarët në Michigan, duke ngritur akuza për mënyrën e kontrollit të hyrjes në sallën ku zhvillohej aktiviteti. Në reagimin e tij, Berisha shkruan: “Këtij i thonë kontroll policesk!”, ndërsa pretendon se Rama i kishte besuar kontrollin e hyrjes në sallën e takimit Pjerin Ndreut.
Nuk ka vonuar reagimi i kryebashkiakut të Lezhës, i cili ka qenë i pranishëm në aktivitet. Ndreu i është përgjigjur akuzave përmes një postimi në rrjetet sociale, duke ironizuar portalet që, sipas tij, kanë ngritur pretendimet ndaj tij. Ai konfirmon gjithashtu të kaluarën e tij në polici, duke theksuar se e konsideron atë një prej krenarive të jetës së tij.
“Dhe po, kam qenë polic. E kam për nder dhe mbetet një nga krenaritë e mia në jetë!”, shprehet Ndreu, duke shtuar se gjatë shërbimit të tij ka bërë detyrën përballë kujtdo që ka shkelur ligjin.
Postimi i plotë nga Pjerin Ndreu
Ju paska dalë punë me mua ca portaleve të Saliut, në USA e në Shqipëri! Isha aty. Madje pashë nga afër edhe nja 30 veta që qirreshin me ulërima në Michigan. Dhe po, kam qenë polic. E kam për nder dhe mbetet një nga krenaritë e mia në jetë!
Kam shërbyer me dinjitet dhe kam bërë detyrën përballë kujtdo që ka shkelur ligjin.
Sot kam një tjetër përgjegjësi, por një bindje nuk më ka ndryshuar, askush nuk është mbi ligjin dhe askush nuk fiton të drejtë duke bërtitur më fort.
Edhe në Amerikë, edhe në Shqipëri, protesta është e drejtë. Shpifja, provokimi dhe shkelja e ligjit janë tjetër gjë.
Prandaj ulërini sa të doni dhe shkruani çfarë të doni. Unë nuk impresionohem nga zhurma.
Kam parë shumë më tepër se kaq në jetën time për t’u impresionuar nga 30 veta dhe disa portale!