Rama mesazh nga Porto Montenegro: Shqipëria s’duhet të humbasë më topin e historisë europiane

Kryeministri Edi Rama, i cili ndodhet në Mal të Zi për pjesëmarrje në Samitin BE–Ballkani Perëndimor, ka reaguar sërish në rrjetet sociale lidhur me protestën që po zhvillohet prej ditësh para zyrës së tij. Rama ka përdorur një gjuhë metaforike nga hotel ”Porto Montenegro” në Mal të Zi, duke nënvizuar se vendi nuk duhet të humbasë më mundësitë që i vijnë në proceset e integrimit dhe zhvillimit.

”LIVE NGA PERLA QË E SOLLËN KËTU DIKUSH QË E PËRZUNË NGA SHQIPËRIA. O çuna goca na e kaluan njëherë këta vëllezërit e vegjël topin për shalësh, për fajin e honxhobonxhove tanë që e lanë topin ta marrë deti. Po tani s’bëhet llaf më, ta harrojnë të gjithë ata që thonë s’duan apo s’na duan, se na kalon prap huq topi i historisë së Shqipërisë së Re Europiane”,-shkruan Rama.

Kryeministri ndodhet në Tivat, ku po merr pjesë në samitin e liderëve të Bashkimit Europian dhe vendeve të Ballkanit Perëndimor, një takim që fokusohet në procesin e zgjerimit të BE-së dhe Planin e Rritjes për rajonin.