Rama ndan pamjet: Arkitekti i njohur Dong Yugan, prezanton vizionin për peizazhin e projektit në Zvërnec

Arkitekti i peizazhit Dong Yugan, një nga emrat më të njohur në fushën e arkitekturës së peizazhit në Azi dhe bashkëpunëtor i studios prestigjioze ndërkombëtare Turenscape, ka prezantuar në Tiranë vizionin e tij për zhvillimin e peizazhit të mbrojtur në projektin e planifikuar në Zvërnec.

Sipas kryeministrit Edi Rama, Dong Yugan, i cilësuar si pasues i arkitektit të njohur të peizazhit Kongjian Yu, prezantoi punën dhe gjetjet e studios Turenscape gjatë festivalit Bread & Heart Festival, përpara një audience të përbërë nga arkitektë dhe profesionistë ndërkombëtarë. Rama vlerësoi rolin e arkitektit në ekipin e ekspertëve të angazhuar për projektin e Zvërnecit, duke theksuar se përfshirja e figurave me reputacion ndërkombëtar synon të garantojë një qasje që harmonizon zhvillimin ekonomik me mbrojtjen e mjedisit natyror.

Postimi i plotë

Njihuni me artistin e madh të natyrës, arkitektin e pejsazhit Dong Yugan, nxënësin pasues të legjendarit Kungjan Yu dhe udhëheqësin e konsulencës mbi pejzazhin e mbrojtur në projektin e Zvërnecit. Ai sot prezantoi përpara një audience me plot arkitektë ndërkombëtarë në Festivalin Bread&Heart në Tiranë, vizionin dhe shumë gjetje të studios prestigjioze ndërkombëtare Turanscape, duke i mbresuar të gjithë me prezantimin e tij.

Nëse do të shihni më shumë nga krijimtaria e studios (https://landezine.com/…/turenscape-landscape-architecture/) do ta krijoni vetë ndjesinë e sigurisë së brendshme, se falë edhe këtij talenti në skuadrën e yjeve që kanë formuar investitorët e projektit të Zvërnecit, ato 4 miliardë Euro që forca të caktuara po bëjnë çmos t’ia heqin nga duart Shqipërisë, nuk mundet kurrësesi të sjellin pasoja negative për natyrën, përkundrazi, do të sjellin një nivel të harmonisë me zhvillimin e natyrës që do të jetë një krenari për Shqipërinë dhe një dhuratë e Shqipërisë për vetë Europën