Rama: Qendra burimore për nxënësit që nuk dëgjojnë, një hapësirë ku edukimi dhe mundësitë ecin bashkë

Kryeministri Edi Rama ka ndarë pamje dhe një mesazh për Qendrën Burimore për Nxënësit që nuk Dëgjojnë, duke vënë në fokus hapësirat dhe mundësitë që ajo ofron për fëmijët. Sipas Ramës, fëmijët aty kanë mundësi të mësojnë, të luajnë, të krijojnë dhe të zhvillojnë talentet e tyre në ambiente të ndryshme, nga klasat dhe kopshti te terrenet sportive, punishtja e qeramikës dhe laboratori i fotografisë.

Në mesazhin e tij, kryeministri veçon gjithashtu mundësinë për të mësuar zanate, si parukeria, duke e përshkruar qendrën si një hapësirë që synon t’i rrisë fëmijët me besimin se mund t’ia dalin. Postimi i Ramës vë theksin te një qasje që ndërthur edukimin me aktivitetet krijuese, sportive dhe profesionale, duke synuar zhvillimin e aftësive dhe talenteve të fëmijëve.

”Qendra Burimore për Nxënësit që nuk Dëgjojnë është një strehë ku edukimi, kujdesi dhe mundësitë ecin bashkë. Këtu fëmijët mësojnë, luajnë, krijojnë dhe ushqejnë talentet e tyre në klasa, në kopsht, në terrenet sportive, në punishten e qeramikës, në laboratorin e fotografisë apo duke mësuar zanate si parukeria, si një hapësirë që në çdo qoshe i rrit këta fëmijë me besimin se mund t’ia dalin”,-shkruan Rama.