Balla: PD dhe LSI të gjejnë një arsye tjetër për bojkot

Sekretari i Përgjithshëm i PS, Taulant Balla thotë se votimi i ligjit për Teatrin Kombëtar është i rregullt. Ai pretendon se ky vota e Vengjel Tavos që nuk ishte fare në seancë nuk është hedhur nga PS, por nga deputetët e LSI.
“Opozita (PD&LSI) bojkotuan sot Kuvendin me arsyetimin se ka ndodhur një gjëmë e rëndë, për shkak se deputeti Robert Bitri ka votuar në vendvotimin e tij, pa ditur se dikush tjetër prej kolegëve të tij në ish-Grupin Parlamentar (LSI) i kish ndërruar kartën e aksesit në votim, duke i vendosur në vendvotimin e vet kartën e kolegut Vangjel Tavo. Pavarësisht se kjo nuk ka ndikuar në rezultatin përfundimtar të votimit. Tani shikoni pamjet filmike që Sekretariati i Votimit mori në shqyrtim. Duket qartë se kush janë deputetët që marrin pjesë në “aksionin’ për ndryshimin e kartës dhe duket gjithshtu edhe momenti kur deputeti Robert Bitri ushtron mandatin e tij për të votuar në vendvotimin e vet. Më vjen keq për Profesor Panaritin që është përfshirë në këtë skenar”,- shprehet Balla.
Ai shton se PD dhe LSI duhet të gjejnë një arsye tjetër për bojkot. “Po tani ka ndonjë ndjesë publike ndaj qytetarëve për bojkotimin e punës nga deputetët e opozitës, edhe pse po ata janë fajtorë të kësaj situate? Gjeni arësye tjetër për bojkot!!! Por jo këtë që ë prodhuat vetë”,- shprehet Taulant Balla në një reagim në Facebook.
Kreu i deputetëve të LSI-së e cilësoi si të pakuptimtë dhe objektin e ligjit që kërkon të miratojë PS. Ai argumentojë se pas reformës në drejtësi, PS po kërkon sërish t’i kthejë kompetenca KLD dhe Prokurores së Përgjithshme.