“Basha nuk më ka folur për bojkotin”

Raportuesi për Shqipërinë në Parlamentin Europian, Knut Fleckenstein, doli në një konferencë për shtyp pas përmbylljes së një vizite në Shqipëri.

Ai u takua me të gjithë, përveç kryeministrit Edi Rama, që ndodhet jashtë vendit.

I pyetur në lidhje me një nga shqetësimet kryesore të kësaj kohe, nëse opozita do bojkotojë zgjedhjet vendore, Fleckenstein tha se kryetari i PD, Lulzim Basha, nuk i ka folur shumë për këtë çështje.

“Basha është burrë i zgjuar dhe nuk më ka folur shumë për këtë çështje. Dhe siç thashë nuk jam arbitër. Nëse një parti nuk dëshiron të marrë pjesë në zgjedhje, është vendim i lirë, i tyre. Kam dëgjuar se legjislacioni apo çështja e ligjit fut në lojë Gjykatën Kushtetuese. Mendoj se ajo është shprehur mbështetur në bindjet e saj, dhe unë personalisht nuk mund të jem më i zgjuar se Kushtetuesja. Më lejoni të shtoj se shpresoj se të gjitha partitë politike të marrin pjesë në zgjedhje”, tha ai.

Një ditë më parë, Basha u takua me Fleckenstein.

“Edhe një herë, z.Basha e denoncoi ndarjen teritoriale, si një hartë të interesave elektorale të dyshes Rama-Meta, kundër interesit kombëtar. Basha theksoi se nuk do të ketë zgjedhje me këtë hartë,” thuhet në një njoftim zyrtar.