Ben Blushi: LIBRA është kundër Ramës dhe Berishës

Më poshtë intervista e plotë e Ben Blushit dhënë për gazetarin Çim Peka:

Çim Peka: Zoti Blushi përshëndetje, ju falënderoj që jemi sërish në FAKT! Po e filloj aty ku e latë dje në parlament ku ju keni mbajtur një fjalim të fortë. Ajo çfarë më bëri përshtypje keni folur për një bashkim të mundshëm mes Shqipërisë dhe Kosovës, retorikë nacionaliste që në fakt nuk është e lidhur fort me profilin tuaj. Çfarë keni parasysh në një analizë më të zgjeruar të bashkimit të Shqipërisë me Kosovën?

Blushi: Në fakt nuk është fare retorikë nacionaliste dhe nuk është në stilin tim. Deklaratë e bërë në një kontekst të ndryshëm. Konteksti në Ballkan dhe në Kosovë në përgjithësi, por sidomos në Kosovë në këtë rast po ndryshon. Pra prej gati 2 muajsh kemi incidente të rënda në Kosovë, të cilat nuk janë pa shkak, të paarsyeshme dhe të paqëllimshme. Këtu kam parasysh rastin e Haradinajt që u arrestua. Kam parasysh ngritjen e murit në Mitrovicë që është ndoshta muri i parë në Europë pas murit të Berlinit. Pas murit të Berlinit nuk ka mur tjetër në Europë, përveç atij që po ndërtohet në Mitrovicë, dhe vazhdon të jetë aty prezent duke ndarë pjesën serbe të Kosovës me atë shqiptare dhe sigurisht rasti i fundit i trenit, për të mos folur pastaj për armatosjen e përditshme të civilëve serbë në Kosovë. Kjo jo vetëm mua por janë shtuar zërat kryesisht në Europë edhe më gjerë që besoj se ka një seknar serb për të ndryshuar kufijtë e Ballkanit. Sigurisht që rendi i Ballkanit ka filluar të ndryshojë në përgjithësi, Rusia është duke u afruar në Ballkan, Bashkimi Europian është pak më i dobët edhe për shkak të problemeve të brendshme, kriza e gjatë ekonomike nuk e ka favorizuar. Në shumë vende të ndryshme të Europës që pas daljes së Anglisë janë duke e menduar nëse ja vlen apo jo ky projekt evropian. Rastet nacionaliste janë shtuar në disa vende për shkak të krizës së emigrantëve duke kushtëzuar apo kërcënuar politikat e jashtme të qeverive dhe ky dobësim ka sigurisht dhe efektin e vet dhe në Kosovë, për të mos folur për efektin Trump që relativisht është i panjohur. Por për sa kohë që është i panjohur, pra në këtë fazë tranzicioni nga administrata Obama në administratën Trump, serbët janë duke provokuar. Ky është konteksti në të cilin jemi sot. Një kontekst i cili na bën të mendojmë se serbët kanë një projekt për të ndryshuar kufijtë e Ballkanit ose të paktën për të kanonizuar Kosovën, pra pjesën në veri të Mitrovicës të jetë nën kontroll dhe pjesë autonome serbe dhe në fakt edhe sot kështu është. Qeveria e Kosovës sot e ka të pamundur të hyjë në pjesën serbe nuk ka administrim policor, nuk ka administrim taksash dhe bashkimi i komunave serbe parashikon pikërisht këtë gjë një Republikë të vogël serbe brenda Kosovës. Nëse kjo ndodh nëse Kosova shkon në ndarje unë kam thënë që procesi i bashkimit të Kosovës me Shqipërinë do të ishte një proces i natyrshëm si pasojë. Unë absolutisht nuk jam për ndryshim kufijsh në Ballkan dhe besoj se shumica e politikanëve shqiptarë e kanë adoptuar këtë pjesë, nuk jemi për ndryshim kufijsh. Në qoftë se kufijtë ndryshojnë  dhe krijohet një Ballkan i ri unë kam thënë që dhe ne duhet të kemi një Shqipëri të re, por jo Shqipëri të madhe.

Çim Peka: Çfarë keni parasysh me Shqipëri të re dhe jo Shqipëri të madhe? Shqipëri pa Mitrovicën?

Blushi: Kjo nuk do ishte dëshira jonë, por nëse rendi i ri, ka zëra në Kosovë, Rexhep Qosja ishte i fundit, ka njerëz në Kosovë që e kanë thënë këtë gjë. Kanë thënë që ndoshta e vetmja mundësi do të ishte ndarja e Kosovës. Unë nuk do e dëshiroja, do të ishte një fatalitet, por kjo nuk varet nga ne. Kini parasysh se si u krijua Kosova, sigurisht që vullneti i popullit të Kosovës ishte lufta e UÇK-së, ishte përpjekje e gjatë diplomatike e autoriteteve të Kosovës në atë kohë, por u kri9jua kur bashkësia ndërkombëtare vendosi që të pushtonte Serbinë në atë kohë, të ndalte gjenocidin dhe ti jepte pavarësinë Kosovës. Pra Kosova kryesisht është një produkt i vullnetit ndërkombëtarë. Nëse ky vullnet ndërkombëtar ndryshon në kontekstin e ri të rendit global ndoshta dhe Kosova do ketë ndryshime.

Çim Peka: Zoti Blushi në momentin që po flasim duket se kemi dhe një tërheqje të mazhorancës në ekstreme për të cilat nuk replikën më nuk debaton më. Duket se dy personazhet politikë që replikojnë me njëri-tjetrin, pavarësisht se duket se po i bëjnë opozitë Ramës është Sali Berisha dhe Ben Blushi. Por në fakt sapo keni folur dje zoti Berisha ka akuzuar Ramën por defacto ka replikuar me ju pikërisht kundër kësaj teze. Berisha u shpreh në këtë studio para një nate se në qoftë se serbët kërkojnë të aneksojnë veriun e Mitrovicës shqiptarët kudo që ndodhen janë në luftë. Ndërkohë ju po thoni se aneksimi i Mitrovicës çon automatikisht në bashkimin e Shqipërisë me Kosovën e mbetur. Pyetja ime për ju është, a do të përfshihen shqiptarët kudo që ndodhen në një luftë nëse do të aneksohet veriu i Mitrovicës?

Blushi: Unë do doja ti shkoja këtij opsioni, pra nuk flas për opsioni militare, kin i parasysh opsionin e zotit Berisha. Zoti Berisha sheh një fuçi baruti poshtë çdo tavoline, por unë nuk dua të shoh këtë. Nuk do doja të kishte luftë dhe konflikt të armatosur në rajon absolutisht jo.

Çim Peka: Në rast se serbët defakto aneksojnë veriun e Mitrovicës, shqiptarët duhet të reagojnë edhe me luftë, apo thjeshtë Shqipëria duhet të bashkohet me Kosovën e mbetur?

Blushi: Shqiptarët duhet të reagojnë me interesat e tyre strategjikë dhe me interesat me bashkësinë ndërkombëtare që janë Bashkimi Europian dhe SHBA-të. Vullneti i të cilave është dhe Kosova. Kosova nuk është një vullnet i pavarur vetëm i popullit kosovar, por është një produkt i përpjekjes ndërkombëtare për të rishikuar historinë, në rastin konkret për të ndërtuar një shtet të dytë shqiptar në Ballkan, siç ndodhi me Kosovën. Shqiptarët i kanë borxh bashkësisë ndërkombëtare dhe duhet të jenë në një hap me bashkësinë ndërkombëtare, është shpejt për të shkuar me opsion militar. Jam i bindur se deri atje ka filluar një dialog është rihapur dialogu Prishtinë-Beograd, shpresojmë që diplomacia të prevalojë. Por është koha për ti dhënë mbështetje autoriteteve dhe popullit të Kosovës për të thënë atë që unë thashë dje në parlament dhe të cilës unë nuk i heq asnjë gram, në qoftë se serbët e Kosovës besojnë se mbas tyre është një shtet dhe ky është shteti i Serbisë, dhe shqiptarët e Kosovës duhet të binden që pas tyre kanë një shtet sovran dhe autonom që është shteti i Republikës së Shqipërisë.

Çim Peka: Është tjetër gjë çështja etnike është tjetër gjë çështja e territorit zoti Blushi? Serbët e Kosovës duhet të binden dhe në fakt këtë po kërkojnë bashkimin me Serbinë. Çështja është se shqiptarët e Kosovës dalin të humbur me bashkimin e Kosovës me Shqipërinë pa Mitrovicën apo dalin të fituar?

Blushi: Unë nuk bëjë këtë llogari.

Çim Peka: Në këto momente që po flasim Mitrovica e veriut është problemi. Sapo u shprehet se shqiptarët e Kosovës duhet të bashkëveprojnë me vendimet e bashkësisë ndërkombëtare?

Blushi: Mitrovica e veriut sot fatkeqësisht është një territor i pushtuar është një territor jashtë administrimit të Republikës së Kosovës. Muri është përpjekja e fundit për të thënë që ky është kufi serb dhe nuk ka arsye të kontrollohet nga administrata shqiptare e Kosovës, ky është një sinjal shumë i keq. Unë do të preferoja që aty të mos kishte provokime në mënyrë që territori i Republikës së Kosovës përfshirë dhe Mitrovicën e veriut të mbetej i pacënuar.  Republika e Kosovës është një fakt i njohur ndërkombëtarisht. SHBA dhe BE e kanë njohur.

Çim Peka: I njohur sëbashku me veriun e Mitrovicës?

Blushi: Sigurisht i njohur si bashkësi territoriale që nuk duhet të cenohet.

Çim Peka: Pikërisht kjo është pyetja dhe ishte një koment që bënte dje një shqiptar i Kosovës gjatë intervistës me zotin Berisha në ueb-in e Syrit. Në momentin që serbët të kërcënojnë me aneksim territori a mund tu ofrosh paqe atyre duke u falur territor siç është rasti i propozimit të Rexhep Qoses që thotë le ta marrin Veriun e Mitrovicës?

Blushi: Sigurisht që jo. Unë nuk po them këtë gjë. Unë them se rendi i ri i gjërave nuk varet vetëm nga ne, ne nuk kemi në dorë të ndryshojmë raportet e mëdha të ndërkombëtarëve siç janë raportet e Rusisë me SHBA-të, këto gjëra nuk i kemi ne në dorë, siç nuk i kishin në dorë serbët në vitin 98-99 kur u bë lufta, e kishin në dorë ata të ndalnin pavarësinë e Kosovës, nuk e ndalnin dot edhe pse kishin një aleat të madh siç ishte Rusia, dhe disa vende të BE-së ishin pro qëndrimit serb. Kosova u krijua si një njësi territoriale e dominuar në shumicë nga shqiptarët. Në më pak se 20 vjet afro 10 vjet që nga shpallja e pavarësisë, Kosova nuk ka arritur dot të jetë një shtet funksional, ka qenë vazhdimisht i provokuar, i provokuar nga serbët, i provokuar nga problemet e brendshme, i provokuar nga varfëria, i provokuar nga korrupsioni, i provokuar nga terrorizmi. Serbët sot janë duke shfrytëzuar problemet e brendshme të Kosovës, dobësinë e institucioneve, një shtet në të cilin është mbledhur parlamenti vetëm 4 herë brenda një viti. Një shtet i cili nuk hyn dot për të prishur murin, të gjitha këto serbët i kanë shfrytëzuar për të treguar se është një projekt i dështuar Europian. Të gjitha këto dhe ajo që thashë unë janë që diplomacia jonë ëhstë shumë e plogët dhe shumë e dobët dhe shumë e kompleksuar sepse mund të ishte në këto kushte e vetmja mbështetje për diplomacinë e Kosovës. Diplomacia shqiptare kam thënë është Amerika, ajo mund të bëjë shumë. Kjo është ajo që kam thënë në parlament dhe dua ta përsëris, mund të bëjë shumë për të arritur në BE. BE që ska akoma një qëndrim zyrtar për Kosovën, se bëhet fjalë për një provokim serb, se serbët duan të aneksojnë veriun e Kosovës, se nëse veriu i Kosovës ndahet atëherë pasoja direkte e kësaj gjëje do ishte bashkimi i Shqipërisë me pjesën tjetër të Kosovës. Pra i themi bashkimit Europian se nëse ju nuk mbroni veriun e Kosovës, atëherë bashkimi i Shqipërisë me kosovën është proces natyral.

Çim Peka: Ky është një debat që ka lindur pas provokimeve serbe, apo provokimeve që kanë ardhur  pas fitores së Donald Trump. Zoti Blushi ka një grup skeptikësh, a mendoni edhe ju se fitorja e Donald trump është një disavantazh për interesat e shqiptarëve në rajon?

Blushi: Unë nuk dua ta besoj këtë se nuk kam fakte, jemi në një fazë tranzicioni. Donald Trump akoma nuk ka pasur kohën e duhur për të bërë të ditur synimet e tij për politikën e jashtme, është duke u marrë kryesisht me pastrimin e administratës Obama dhe me politikën e vet të brendshme. Muri me Meksikën, raporti që po vendos me investitorët amerikanë përtej oqeanit si thuhet, pra po merret me problemet e veta të brendshme. Pra nuk kemi arsye të besojmë se administrata Trump ka një qëndrim të ndryshëm nga administrata Obama apo Klinton në raport me shqiptarët. Por sigurisht që kjo fazë tranzicioni e kalimit nga një administratë në një administratë tjetër, ka krijuar mesa duket dhe një hutim. Hutim në Europë, absolutisht po, Brukseli, Berlini, Paris, Roma janë të hutuara se çfarë presin nga era Trump, kush do jenë raportet e Trumpit me Europën, raportet e Trumpit me Ballkanin, raportet e Trumpit me Rusinë e Putinit, raportet e trupit me terrorizmin. Sigurisht që kjo ka krijuar një hutim në Prishtinë, në tiranë më së shumti. Në Tiranë zhvillohet vetëm ky debat sot, se çfarë do të bëjë Donald Trump. Një pjesë janë naivë dhe besojnë se Trump do na shpëtojë nga problemet e brendshme që kemi me qeverinë, një pjesë janë skeptikë dhe mendojnë që administrata Trump nuk do të jetë shumë e favorshme me shqiptarët. Unë nuk kam asnjë fakt për të thënë që administrata Trump do favorizojë serbët më shumë se shqiptarët, nuk kam arsye ta them këtë, përderisa nuk e ka thënë këtë gjë deri tani.

Çim Peka: Ju nuk keni arsye, por kryeministri që ju keni votuar deri në këtë moment jo vetëm që nuk e ka uruar por po i bën haptazi karshillik. Pak më parë kemi botuar një dokument ku SHBA dhe NATO i kanë kërkuar Shqipërisë që të mos votojë një rezolutë e cila është kundër interesit amerikan. Në tetor zoti Rama nuk e ka votuar dhe më 26 dhjetor ditën kur është certifikuar rezultati për Donald Trump, ka votuar pro kësaj rezolute duke dalë kundër vendeve të NATO-s dhe në mënyrë të veçantë kundër shteteve të Bashkuara të Amerikës.  Gjithashtu tashmë është e qartë se dy kolonat e politikës së jashtme amerikane, Irani dhe Kina janë problemi i saj kryesor. Pas fitores së Donald Trump, zoti Rama për herë të parë ka dërguar ministrin e jashtëm në Iran, e cila flet për një bashkëpunim ekonomik dhe vetë ka qenë në Singapor ditën e inaugurimit duke orientuar ekonominë sipas tij drejt Azisë. A ju duket tashmë se Edi Rama e ka zhvendosur përfundimisht Amerikën si aleate të Shqipërisë. D.m.th në qoftë se ne jemi në pritje të Donald Trump i cili ende nuk ka dhënë asnjë konkluzion se çfarë do të bëjë, zoti Rama duket se e ka marrë këtë vendim, nuk është më Amerika aleatja e madhe?

Blushi: Unë nuk besoj se zoti Rama e ka këtë guxim të ndryshojë raportin strategjik që ka Shqipëria me SHBA-të. Nuk e ka këtë guxim dhe unë kam arsye të besoj se është kaq frikacak sa mos e bëjë këtë gjë. Sigurisht që në zgjedhjen e Donald Trump ai ka bërë një gafë të cilën sigurisht çdo politikan normal do të kishte kërkuar ndjesë të paktën, ka bërë një gafë duke e cilësuar Trumpin si turpin e civilizimit dhe si një njeri që do të bllokojë marrëdhëniet mes SHBA-ve dhe Shqipërisë.

Çim Peka: Por po i shkon pas kësaj deklarate, nuk është se po tërhiqet?

Blushi: Unë nuk besoj se ka këtë guxim.

Çim Peka: Pa pasur asnjë lloj indicieje nga administrata Trump, zoti Rama po funksionon në mënyrë të hapur në funksion të kësaj deklarate, pra defakto po i bënë karshillik politikës së jashtme amerikane, pra tek e fundit kush është Shqipëria?

Blushi: Zoti Rama u fut në garën presidenciale në Amerikë si një njeri i marr me qera, këtë e kam thënë dhe në parlament. Pra u mor me qera nga një palë kundër palës tjetër, për çfarë sepse sigurisht që një shtet i vogël si Shqipëria me 3 milionë banorë nuk mund të ndikojë dot në votën e 300 milionë amerikanëve, është si një pikë uji të përmbysi një gotë ose një kazan. Por zoti Rama u mor me qera nga një palë për të krijuar në SHBA një përshtypje sikur në Europë  Donald Trump ëhstë i padëshiruar, dhe nga të gjithë kryeministrat e Evropës doli vetëm ky, duke treguar që është më mendjelehti një njeri që merret me qera, kjo është e vërtetë. Me aq sa e njoh, nuk është se ka guxim që të cënojë raportet shqiptaro amerikane. Megjithatë realisht të gjithë jemi në pritje përfshirë dhe zotin Rama për të parë se çfarë do të jetë administrata Trump, si do përfaqësohet në Tiranë, çfarë ndryshimi do të kenë politikat e kësaj administrate në raporet me Ballkanin dhe sigurisht zoti Rama ju detyrohet shqiptarëve një ndjesë, qoftë edhe për faktin se siç kam thënë në parlament e përsëris, duke e personalizuar totalisht politikën e jashtme, personalizoji raportet me SHBA-të, sepse deklarata e tij ishte personale. Një kryeministër nuk ka të drejtë të flasi ashtu, zoti Rama ka folur në mënyrë personale duke abuzuar me postin e kryeministrit.  Pra e personalizuar në përgjithësi diplomacinë. Ky është rasti që thashë, rast konkret është rasti klasik i zotit Rama me Serbinë. Unë e kam thënë që ka sheqerosur pa shkak themelor raportet me Serbinë dhe ka helmuar raportet me Greqinë edhe këto për arsye personale. A ke parë kryeministër që ta bëjë politikën e jashtme me Greqinë shtet aleat, anëtar i NATO-s, anëtar i BE-së, pavarësisht cinizmit në disa raste apo naivitetit të politikës greke që lexon keq shumë gjëra që ndodhin në Shqipëri. Pavarësisht kësaj një kryeministër nuk mund të bëjë politikë të jashtme me shtetin fqinj përmes Facebook-ut. Kjo është të jesh totalisht naiv dhe të mos kesh asnjë raport me diplomacinë. Kjo është fatkeqësisht qasja e zotit Rama me diplomacinë, këndon o ‘Sole mio’ me ministrin e jashtëm serb, ‘o sole mio’ nën çfarë, nën diellin që po zihet në Kosovë dhe bën politikë facebooku me Greqinë, është totalisht e padrejtë. Diplomacia jonë është në ditën e saj më të keqe, dhe mund të të bëj përmbledhjen me 3 fjali. Raportet me SHBA-të kanë një problem apo jo edhe me këtë që ndodhi. BE nuk na i hapi negociatat çka e ka dëmtuar rolin e Shqipërisë. Nuk na i hapi negociata BE para 2 muajsh. Raportet me Greqinë i kemi në pikën më të ulët që nga viti 94-r. Që nga viti 94-r  që nga koha e Sali Berishës kur u arrestuan 6 minoritarë. Që prej 20 vitesh nuk kemi raporte më të këqija me Greqinë që është totalisht e paarsyeshme. Raporti me Serbinë, në qoftë se zoti Rama do të kishte arritur një produkt, se realisht mburret se ka arritur një marrëveshje për të shkëmbyer disa të rinj. Pra disa të rinj kanë të drejtë të shkojnë në Beograd dhe disa të rinj serbë të vijnë në Tiranë, çfarë produkti është. Nëse do të kishte një produkt do të dukej në Kosovë, administrata e Vuçiçit pas takimit me zotin Rama është më agresive se para këtyre takimeve me Kosovën. Që do të thotë se këto takime kanë qenë totalisht të pafrytshme dhe në fakt më vjen keq ta them, por Aleksandër Vuçiç e ka përdorur Edi Ramën për të ndryshuar imazhin e vet në Bruksel, çka e ka arritur me shumë sukses. Zoti Rama nuk pasi mundësi të përfitonte se në fakt ne nuk na u hapën negociatat, ndërsa zoti Vuçit e relalintiVIzoji me shumë sukses. Përdori zotin Rama në Bruksel për  ti thënë Brukselit, BE-së dhe SHBA-së që unë kam marrëdhënie shumë të mira me zotin Rama, të cilën zoti Rama nuk e relativizmi. Zoti Rama nuk pati dot mundësi për të marrë zotin Vuçiç në telefon të cilën duhet ta kishte bërë me aq miqësi sa  duket se kanë krijuar ti thotë që ndale trenin që po hyn në Kosovë, as këtë se ka bërë. Deklaratat e qeverisë shqiptare mbas incidentit në Kosovë janë ndoshta më të butat nuk e di për çfarë arsyesh.

Çim Peka: Nuk e di për çfarë arsyesh? A keni një analizë se për çfarë e ka bërë edhe pse nuk e di? A keni një dyshim?

Blushi: Jo unë nuk kam një dyshim se këtu bëhet fjalë për një konspiracion, besoj që Rama është intimiduar nga Vuçiç dhe për këtë arsye nuk ka për të qenë dot një cak të caktuar, çka e dëmton Kosovën. Deklarata që duhet të vinin nga Shqipëria duhet të ishin më të forta në raport me Kosovën.

Çim Peka: Zoti Blushi ju nuk jeni opozita e djathtë, por në fakt ju jeni opozita e zotit Rama. Duket se opozita kryesore në vend e ka marrë me shumë optimizëm fitoren e Donald Trump, madje për këtë gjë edhe po kritikohet duke aluduar se po pret gjithçka nga çfarë do sjelli prej atje. A është Ben Blushi optimist, apo a ndjehet më komod për fitoren e Donald trupo për situatën e brendshme në Shqipëri?

Ben Blushi: Unë e kam thënë dhe do ta përsëris, unë nuk besoj se Trump do të zgjidhë problemet e brendshme të Shqipërisë. Shqipëria ka problem me krimin, korrupsionin, cenimin e zgjedhjeve të lira dhe të ndershme, me kanalizimin, emigracionin, papunësinë. Shqipëria nuk është një vend që garanton punë dhe të rinjtë po ikin nga Shqipëria, ka probleme me dobësimin e institucioneve të përditshme dhe ka problem themelor kapjen e shtetit nga krimi. Unë nuk besoj se Trump do na zgjidhi këto çështje, kushdo që bëhet optimist bëhet për arsyet e veta. Por unë nuk besoj se duhet të bëhemi optimistë si plaka në Oriham, si ai personazhi i Ismail Kadaresë, që hapte çdo ditë lajmet tek BBC-ja tek bodrumi i shtëpisë së vetë të cilën ja kishin privatizuar ata që ishin në kat të dytë, ku priste me shpresë se aleatët britanikë apo ata amerikanë në vitet 45-46 mund të bombardonin komunizmin që i kishin marrë asaj shtëpinë. Nëse opozita shqiptare është në opozitën e plakës në Oriham dhe pret që problemet e saj t’ia zgjidhin SHBA-të kjo nuk ka për të funksionuar. Shqipëria nuk është Indi dhe as Pakistan që janë vende me armë bërthamore me popullsi të madhe me rëndësi strategjike për botën dhe SHBA-të, Shqipëria nuk është as Turqi, Shqipëria është një vend i vogël në Ballkan që ka rëndësi strategjike për shkak të Kosovës dhe Maqedonisë në rendin global, prandaj them që gjithë këto çështje duhet ti zgjidhim vetë. Çfarë mund ti bëjë Trump numërimit elektronik. A mund të dalë Trump dhe të thotë që numërimi i votave në Shqipëri duhet të jetë elektronik, gjë të cilën nuk ka për ta bërë kurrë se s’ka pse merret me këtë çështje. Këto janë çështje që opozita shqiptare duhet ti kishte zgjidhur, por nuk i ka zgjidhur i ka injoruar. Unë e kam thënë që opozita shqiptare për fat të keq, opozita konvencionale ka injoruar zgjedhjet e lira që është kauza e zgjedhjeve të lira. Nuk ka çfarë i bën fare Trump. Donald Trump nuk mund të marrë Ramën në telefon dhe ti thotë që votoni në mënyrë elektronike apo numëron i votat me një robot, ky ishte detyrim themelor i PD-së që e tradhtoi dhe është duke e tradhtuar akoma tani që flasim. Keni për të parë që nuk keni për të pasur as votim elektronik, as numërim elektronik dhe sërish do të ketë zgjedhje dhe sërish opozita do të ankohet për alibi që i ka krijuar vetë. Duhet tu them një fakt, nga qershori i vitit të kaluar, kur u ngrit komisioni i Reformës Zgjedhore deri në fillim të dhjetorit kur ai skadoi se 6 muaj ishte afati, PD nuk ka paraqitur asnjë amendament dhe është mbledhur komisioni vetëm një herë, ditën e parë, asnjë ditë tjetër. Kë duhet të akuzojë atëherë se e tradhtoi, se qeveria ëhstë nga natyra e gatshme të tradhtojë zgjedhjet, por opozita nuk duhet të jetë kurrë e gatshme të tradhtojë zgjedhjet. E dini pse ndodh kjo, se dhe PD dhe rilindja janë bashkë në të njëjtën varkë, se secila ka një komisioner apo një numërues në tavolinë dhe mendojnë që do ti ndajnë votat e të gjithë Shqipërisë në tavolinë, çka nuk është normale.

Çim Peka: Ju a keni menduar se si do ti mbroni votat duke qenë se nuk jeni pjesë e kësaj varke?

Blushi: Pse duhet të mendoj se do mi vjedhin, se këtu fillon. Në një vend normal që është Sllovenia apo Hungaria, në qoftë se disa njerëz mblidhen për të krijuar iniciativë të re politike gjëja e parë që ata nuk mendojnë është mbrojtja e votës, sepse nuk duhet të ndodhi.

Çim Peka: Fatkeqësisht nuk jemi në Slloveni, realiteti është ky. Ju jeni i bindur që do preken votat dhe kushdo është i bindur që do preken votat.

Blushi: Unë jam i bindur që numëruesit e partive politike janë armiqtë më të mëdhenj të zgjedhjeve në Shqipëri. Jam i bindur që kjo mënyrë ky sistem i numërimit të votave në mënyrë partiake dhe manuale duhet të ndryshojë. Sot janë 4 parti që numërojnë votat e të gjitha partive. Një nga arsyet që LIBRA ka dalë është për të rrëzuar dhe rilindjen, se skam gjë me PS-në, por dhe PD-në që quhen pjesë e estabilishmentit. Tani të dyja këto do mbrojnë votat e kundërshtarit, a mund të ndodhi kjo? Unë jam për largimin e numëruesve partiakë dhe mundësisht nga numëruesit manualë.

Çim Peka: Zoti Blushi në këto zgjedhje që janë vetëm pas 5 muajsh, kush do ja mbrojë votat LIBRA-s?

Blushi: LIBRA do jetë aty për të garantuar votat e veta.

Çim Peka: Si do jetë?

Blushi: Me aq sa ka mundësi, do jetë me vëzhguesit e vet, me njerëzit e vet që do jenë të trajnuar aq sa sistemi jep mundësi. Kjo nuk do të thotë se ne dekurajohemi, ne nuk dekurajohemi absolutisht. LIBRA do të shkojë për të mbrojtur votat e veta në çdo kuti votimi, padyshim.

Çim Peka: A do të jetë LIBRA në koalicion me Rilindjen?

Blushi: LIBRA nuk do të jetë në koalicion me askënd deri ditën që anëtarësi e vet do vendosi ndryshe. Ne kemi marrë një vendim strategjik, ku jemi në fazën që po bëjmë zgjedhje të brendshme mbas kësaj do shkojmë brenda marsit për të zgjedhur kandidatët tanë në të gjithë Shqipërinë me një proces të hapur transparent elektronik dhe në qoftë se kjo çështje shtrohet për zgjedhje, anëtarësi e LIBRA-s do vendosi në çfarë koalicionesh LIBRA do të marri pjesë, gjë që2 kjo nuk ka për të ndodhur ky është mendimi im. Në qoftë se anëtarësia e LIBRA-s do të vendosi që duhet të jemi në koalicion me dikë kjo ka për të ndodhur.

Çim Peka: Edhe me rilindjen?

Blushi: Ky është vendim sovran i anëtarësisë.

Çim Peka: Edhe me Rilindjen?

Blushi: Në qoftë se do më pyesni mua personalisht, unë do preferoja që LIBRA të shkonte në zgjedhje për të rrëzuar njëkohësisht rilindjen dhe PD-në, apo më saktë Sali Berishën dhe Edi Ramën të dy bashkë si zgjatime të të njëjtit fenomen, të fenomenit të kapjes së shtetit, të korrupsionit, të kanalizimit, të cenimit të zgjedhjeve të lira dhe të personalizimit të politikës së brendshme dhe të jashtme vazhdimisht.

Çim Peka: Sali Berisha është rrëzuar zoti Blushi në qoftë se nuk e dini. Është rrëzuar që në 2013-n.

Blushi: Sali Berisha nuk është rrëzuar dhe kjo është arsyeja që PD është në ngërç. Shqiptarët e rrëzuan njëherë Sali Berishën si kryeministër në 2013-n, por OD është në ngërç dhe do të jetë në ngërç derfi ditën kur të rrëzojë Sali Berishën si lapidar brenda saj. Nëse PD nuk bën këtë proces atëherë PD nuk ka për të ardhur asnjëherë në pushtet. Perceptimi në vija të përgjithshëm është se vota për PD-në në fakt është votë për Sali Berishën, kjo është arsyeja që PD nuk ka për të ardhur asnjëherë në pushtet.

Çim Peka: Pra sipas jush PD nuk ka për të ardhur asnjëherë në Pushtet?

Blushi: Po për sa kohë Sali Berisha është aty, është njeriu që merr vendimet.

Çim Peka: Ky është mendimi juaj, pasi zoti Berisha i pyetur në këtë studio e mohon kategorikisht dhe të njëjtën gjë bën edhe zoti Basha.

Blushi: Unë jam një njeri që vij nga parlamenti, dhe në parlament zoti Berisha nuk flet si një njeri mendimtar i pavarur, flet dhe shpërdoron kohën e opozitës në mënyrë brutale. Përfshirë të gjithë opozitën, në qoftë se e gjithë opozita konsumon 6 orë vetëm zoti Berisha konsumon 3-4 orë, në emër të kujt, në emër të PD-së. Por ky nuk është problemi im. Unë jam i kënaqur që Sali Berisha perceptohet si PD, për shkak se kjo është ajo që mendoj. LIBRA kërkon të mbledhë vota dhe kundër rilindjes dhe kundër PD-së dhe personalisht mua më pëlqen që zoti Berisha të rrijë atje duke e parë si kundërshtar.

Çim Peka: Personalisht, nuk jam duke pyetur këtë herë si votim të anëtarësisë së LIBRA-s, personalisht në rast se Sali Berisha do të tërhiqej nga PD, a do të ishte i gatshëm Ben Blushi të bënte koalicion me opozitën?

Blushi: Unë nuk e mendoj fare këtë gjë, jam duke u përgatitur për zgjedhjet e ardhshme. Sigurisht që Saqli Berisha është një pengesë shumë e madhe për shumëkënd që do të donte të bashkëpunonte për kauza të caktuara me PD-në, por unë nuk mendoj për këtë gjë. Nuk besoj se Lulzim Basha ka mundësinë, aftësinë dhe pasionin për ti thënë Sali Berishës shko në shpi sepse kjo do ishte e vetmja rrugë për të ndryshuar fatet e opozitës në Shqipëri dhe për të krijuar një opozitë pak më të besueshme se qeveria e sotme. Të dyja janë në të njëjtin nivel për arsye që i flasim dhe unë nuk mendoj fare për atë gjë, mendoj vetëm për zgjedhjet e ardhshme.

Çim Peka: A mendon Ben Blushi për një koalicion me Ilir Metan?

Blushi: Unë nuk mendoj për asnjë koalicion por asnjë nga partitë që kanë qeverisur apo qeverisin sot. Thashë ky është një vendim i anëtarësisë LIBRA. Mendimi im personal do ishte që LIBRA duhet të shkonte vetëm në këto zgjedhje. E para se LIBRA ka një qëndrim ndryshe nga të gjitha partitë që ju më përmendët, e dyta se të gjitha partitë që ju më përmendët kanë përgjegjësi për të gjitha gjërat që LIBRA do ti ndryshojë, është papunësi, korrupsion, kapje shteti, kanabizim,  kriminalizim dhe ngadalësim reformash. LIBRA ka një projekt të ndryshëm dhe një projekt të ri i cili është vështirë të bashkohet me shumë çka ofrojnë partitë e vjetra, dhe unë nuk mendoj fare për këtë gjë. Por unë prapë po them besoj dhe jam i bindur qyq rilindja dhe LSI do shkojnë bashkë edhe në këto zgjedhje.

Çim Peka: Rilinja dhe LSI do shkojnë bashkë në këto zgjedhje. A e mendoni sërish Ramën kryeministër pas këtyre zgjedhjeve?

Blushi: Rama nuk do ketë votën time në asnjë rast, nuk mendoj çfarë do bëjë ai, unë mendoj që çfarë do bëjë LIBRA. LIBRA është një projekt kundër Edi Ramës, kundër Sali Berishës dhe kundër mënyrës që ata kanë qeverisur për 25 vjet sepse janë segmente të të njëjtës rrugë,. Ka ardhur koha që Shqipëria të qeveriset ndryshe.

Çim Peka: përmendet dy emra që LIBRA është një projekt kundër Ramës dhe Berishës, po kundër Metës?

Blushi: Absolutisht kundër të gjithëve por të mora dy partitë kryesore nuk e përjashtoj Ilir Metën. Ilir Meta është bashkautor i Rilindjes, pra ka te rilindja 30-40 për qind të aksioneve. Kur flas për rilindjen flas për PS-LSI, pavarësisht se janë shtuar dhe disa bishta të vegjël, kjo është e përbashkët. Çfarë është rilindja tu them, se shumë njerëz thonë çfarë ke me rilindjen? Rilindja është një grumbull mbeturinash të PD-së dhe PSË. Pra mbetjet e PD-së dhe mbetjet e PS-së kanë formuar rilindjen. Pra ky është një grup njerëzish që abuzojnë me pushtetin, është një bandë e korruptuar njerëzish mbi kurrizin e të cilëve në fakt duhet testuar Reforma në drejtësi. Se nëse reforma në drejtësi nuk testohet mbi kurrizin e rilindjes, i bie që nuk ka reformë në drejtësi, pra nuk funksionon. Absolutisht po, në qoftë se nuk testohet mbi rilindjen dhe sigurisht mbi qeveritë që kanë qenë para rilindjes por unë flas për këta që janë në pushtet sepse abuzimi me fondet publike është katastrofal dhe këtu duhet të fillojë reforma në drejtësi, pa lënë mënjanë 21 janarin dhe të gjitha abuzimet që janë bërë në 8 vitet e shkuara të PD-së.

Çim Peka: Meqenëse jemi këtu, sa herë flisni për korrupsionin zakonisht merrni një emër Vangjush Dakon, këtë gjë keni bërë dhe sot?

Blushi: E kam bërë sot se sot kam folur për çështjen e ARMO-s. ARMO rezulton të jetë një kompani publike që u privatizua gabim dhe në mënyrë të papërshtatshme në kohën e qeverisjes së PD-së, e cila nuk funksionoi, ka ndryshuar duar duke krijuar borxh pas borxhi. Sot e administron një kompani shqiptare në mënyrë të paligjshme. Unë them që ARMO nuk i jep qeverisë atë që duhet ti japi. Është një tregues se si menaxhohen pronat publike në mënyrë të paligjshme kundër interesit publik. Pse Shqipëria ka problemet që ka sot, se nuk mbrohet në asnjë rast interesi publik por vetëm ai privat, ky është rasti. E dini sa para humb buxheti i shtetit nga menaxhimi i naftës në Shqipëri, 200 milionë euro afërsisht. Që nga dalja në burim deri tek rafinimi tek ARMO. Afro 200 milionë dollarë humbim ne. Ajo që kam thënë sot dhe e mbështes është që sikur shteti shqiptar vetëm paratë që i ka dhënë Vangjush Dakos, afërsisht 60 milionë euro në 3 vjet, Vangjush Dako si kryetar i Bashkisë së Durrësit ka përfituar tendera publik, pra ndërtime në qytet nga qeveria e rilindjes mbi 60 milionë euro. Nëse ne të dy shkojmë tani në Durrës Çim, ky nuk është qytet që ka lulëzuar, me 60 milionë euro mund të shkëlqesh Parisin jo Durrësin. Aty përveç një sheshi mediokër dhe ca çadrave prej betoni nuk ka asgjë tjetër. Sikur këto para të kishin shkuar për të shlyer borxhet e ARMO-s dhe shteti ta merrte në administrim duke i vënë në punë punëtorët do kishim përfituar më shumë të ardhura dhe shtetit do ti ishte kthyer një kompani publike të cilën e ka të vetën. E mora Vangjush Dakon si shembull të mënyrës se si shpërdorohen paratë në Shqipëri dhe kur ne pyesim ku kanë shkuar 1.5 miliardë euro të marra borxh nga Rama për 4 vjet, ja pra ku kanë shkuar. 60 milionë euro në Elbasan, 60 milionë euro në Durrës, 20-30 milionë euro në Kavajë tek Elvis Roshi, 10-15 milionë euro tek Tërmeti i Tepelenës, ca të tjera tek një bandit i vogël në Krujë, kështu janë shpërndarë paratë. Këta njerëz me pjesën dërrmuese të parave abuzojnë i kthejnë në klientelë dhe vijnë në qershor blejnë vota me taksat tona. Trump bëri fushatë me lekët e veta nuk i bëri me lek taksash. Këta marrin taksat i përdorin për 4 vjet abuzojnë me to dhe vijnë pas 4 vjetësh dhe i thonë fshatarit na të të jap 50 mijë lek, nuk i kanë nga xhepi i tyre, blejnë njeriun me taksat që i marrin, ky është cikli korruptim në Shqipëri.

Çim Peka: Ka një diskutim tek analistët e ndryshëm, që në rast se shqiptarët zgjedhin sërish rilindjen për shkak të këtij ngërçi të kreut të rilindjes me administratën e re, po qarkullojnë emra Erjon Veliaj, Pandeli Majko, Saimir Tahiri kush mund të ishte pasuesi i denjë për Partinë socialiste pas zotit Rama?

Blushi: Unë mendoj që pas rilindjes nuk ka më asgjë. Në qoftë se të gjithë analistët e Shqipërisë besojnë se pas 5 vjetësh flas për një cikël mesatar kjo klasë politike do jetë akoma në këmbë për të diskutuar se çfarë bëri Edi Rama apo Sali Berisha tregon se janë miopë. Shqipëria ka për të pasur një klasë të ndryshme politike maksimumi për 5 vjet. Sali Berisha, Edi Rama, Ilir Meta dhe shumë prej njerëzve që sot duket sikur kanë në dorë fatet e vendit nuk do jenë më. Shqipëria po përgatitet për një ndryshim të madh, ky mund të jetë favori që mund të vijë nga SHBA-të, nevoja për të përmbysur estabilishmentet e kalcifikuara. Ndodhi në Amerikë në masën që ndodhi, shumë njerëz nuk e kanë lexuar si përmbysje estabilshmenti, por shumica dërrmuese e quajtën si të tillë. Analistët e hollë merren me gafat presidenciale në Amerikë, ato janë ekzotike por nuk është ky thelbi. Thelbi ishte nevoja e popullit amerikan për të rrëzuar estabilishmentet e veta. Nuk e di sesa do e arrijë Donald Trump këtë gjë, por kjo është tendencë globale. Kjo do vijë në Europë, ka ardhur në Itali. Njeriu që do të përmbysë estabilishmentin sot nëse bëhen zgjedhjet nesër fiton zgjedhjet. Bepe Grillo me forcën e vet politike është i pari në çdo sondazh apo jo. Në Angli ndodhi pak a shumë e njëjta gjë, por jo në përmasat që pritet të ndodhi në Europë pasi është një vend i ekuilibruar dhe ekonomia e Anglisë ishte në ditët e saj më të mira, më e shëndoshë sesa Europa, ka për të ndodhur në Europë. Ndodhi në Greqi, u përmbysën dy partitë tradicionale, kjo ka për të ndodhur dhe në Shqipëri. Kështu që të jeni të bindur se kushdo që bën një analizë se kush do të jetë pas 5 vjetëve mbas këtij apo pas atij s’ka për të pasur asnjë gjë. Ka për të pasur vetëm një gjë, o drejtësi nga ligji ose drejtësi nga populli. Drejtësia e ligjit dhe ajo e popullit kanë port tu bashkuar së bashku për të përplasur këtë klasë politike, është absolutisht e parashikueshme. Kush nuk e lexon do të thotë se nuk ka dëshirë të lexojë. E di si më duken mua shumica e analistëve të Shqipërisë, janë si ata gazetarët e Zërit të Popullit që në fakt mund të ishin çikë më liberalë në vitet 85-86 që thonin kush mund të jetë mbas Enverit, por mirë po mas Ramizit kush mund të jetë. Pas Enverit dhe pas Ramizit nuk kishim më asgjë, u shemb. Aty jemi ne sot, jemi në vitin 87-88 dhe sot jemi 30 vjet mbrapa por jemi po në atë cikël. Hajde të të bëj një xhiro në qytete e Shqipërisë që të kuptosh se si varfëria që zbrazen përditë është shumë e ngjashme me varfrin e viteve 86-87-88 kur izolimi i gjatë lodhja nga dhuna e komunizmit mungesa e inovacionit e kishte mjeruar Shqipërinë. Po rritje një brez totalisht pesimist, nuk kishte punë dhe mbanim radhën nëpër dyqane. E mban mend kur mbanim radhë nga maja e rrapit 5 orë për të blerë një bukë, qumësht. Sot Shqipëria është më e hapur por çfarë kufiri ka, sot ka kufirin e korrupsionit dhe të varfërisë, atëherë kishe kufirin politik tani ka kufi financiar. Është e njëjta gjë, provincat e Shqipërisë janë po aq të varfra, ky mjerim ku do shkojë? Mendoni ju se do thotë hajt ta kthejmë Sali Berishën në pushtet? Apsolutisht. Mendoni ju se do thoj si ta trukojmë pak Edi Ramën që të duket si Erjon Velija? Absolutisht, ky mjerim do ti rrëzojë të gjithë. Kush nuk e kupton këtë nga analistët më duket si ata gazetarët liberalë të ZP-së në vitet 86-87 këtu jemi mbas 30 vjetësh.

Çim Peka: Por vetë vini nga gazetaria?

Blushi: Vij nga gazetaria por kjo nuk do të thotë që vetë nuk jam i prekur nga ky virus, por nuk kam arsye që të mos shikoj në të ardhmen. Shikoj një të ardhmen sepse duke lexuar se çfarë po ndodh dhe duke dalë nëpër Shqipëri, ky mjerim nuk mund të kthehet në skllavërim do kthehet në ndryshim. Po të jetonim në Indi ose Pakistan mjerimi ynë do kthehej në skllavërim shumë të gjatë. Por ne jetojmë në Europë. Në Europë ky ndryshim ka ardhur, do vijë dhe në Shqipëri. Meqenëse jetojmë në mes të Europës dhe gjeografia na ka shpëtuar që jemi këtu ku jemi në mes të Europës, kjo erë ka për të ardhur dhe në Shqipëri, dhe ky mjerim dhe kjo varfëri nuk do kthehen në emigracion total, nuk do kthehet në skllavërim siç duket sot do kthehet në nevojë të madhe por ndryshim. Ka dy mundësi ose populli të nxisi axhenda të reja politike dhe të votojë për njerëz të rinj, nuk është e pamundur ose populli të gjejë rrugët e veta revolucionare dhe popullore çka mund të na çonte në një kaos tjetër por mund të ishte një zgjidhje, nuk e dimë akoma.

Çim Peka: Zoti Blushi faleminderit!

Blushi: Faleminderit dhe ju.