Bushati: E dinim se kemi një afat kohor. Fleckenstein: Bëni detyrat e shtëpisë!

Shtyrja e çeljes së negociatave të BE-së me Shqipërinë për qershorin e ardhshëm, është kryefjala e debatit politik. Paraditja e kësaj të hëne, ka mbledhur në një aktivitet pas konkluzioneve të Këshillit të Ministrave të Bashkimit Europian, Ministrin e Europës dhe Punëve të Jashtme, Ditmir Bushati, raportuesin e Shqipërisë në PE, Knut Fleckenstein dhe ambasadoren e Bashkimit Europian në Shqipëri, Romana Vlahutin.

Ministri Bushati deklaroi se “duke u nisur nga precedenti që BE-ja ka vendosur me Malin e Zi dhe Serbinë, e dinim që do të ishte një vendim me afat kohor”. “Një vit kohë mendoj se do të jetë i mjaftueshëm për punën përgatitore, që më pas të nisin zyrtarisht negociatat”, u shpreh Bushati.

Raportuesi për Shqipërinë në Parlamentin Europian, Knut Fleckenstein, u shpreh se qevria duhet të bëjë detyrat hap pas hapi. ”Duhet të bëni detyrat e shtëpisë, hap pas hapi”, tha Fleckenstein.

Ndërsa ambasadorja e BE-së në vendin tonë, Romana Vlahutin theksoi se vendi ka humbur shumë kohë në të shkuarën, por është e rëndësishme që Shqipëria ka bërë punë të madhe me reformën në gjyqësor. “Pa reformën në gjyqësor, sot nuk do të ishim duke bërë këtë diskutim”, tha Vlahutin.