Ç’po ndodh me “platformën Alibeaj”? Edhe një deputet deklaron se nuk ka firmosur!

Politikë E Diel, 17 Prill 2022 21:24

Dje kryetari i grupit parlamentar të PD-së Enkelejd Alibeaj deklaroi se platformën e tij e kanë firmosur 31 deputetë, por nga dje deri këtë dielë në darkë 3 deputetë që paskan firmosur deklarojnë se nuk e mbështesin platformën e Enkelejd Alibeajt.

Pra ç’po ndodh me 31 deputetët që u tha se kanë firmosur? E kanë kuptuar se janë keqpërdorur dhe mashtruar?!

Deputeti shkodran Zef Hila ka publikuar këtë status në faqen zyrtare të tij në facebook, ku e rrëzon Enkelejd Alibeajn.

Ja statusi i deputetit:

Nga Zef Hila, deputet i PD-

Të nderuar demokratë të Bashkisë Vau Dejës dhe Qarkut të Shkodrës,

Si përfaqësues i juaji në Parlamentin Shqiptar, pjesë e Grupit Parlamentar të Partisë Demokratike, ndjej detyrimin tim personal për të sqaruar të gjithë demokratët e Qarkut Shkodër, për qëndrimin tim lidhur me situatën aktuale në Partinë Demokratike të Shqipërisë.

Situata e vështirë, në të cilën po kalon forca e vetme me frymë demokratike, e lindur në vitet 90 për të sjellë ndryshimin në Shqipëri, sot ka nevojë për Bashkim, dhe asnjë “përçarje”.

Të gjithë jemi njohur me platformën e propozuar, e cila lë shumë hapësira dhe krijon “ngërçe”, të cilat nuk zgjidhin por përkeqësojnë situatën në radhët e demokratëve.

Si zëri juaj dhe përfaqësues i demokratëve ndjej detyrimin t´ju bëj me dije qëndrimin tim përballë kësaj situate:

1. Grupi parlamentar i dalë nga zgjedhjet e 25 Prillit 2021 duhet të jetë unifikues, duke filluar me shfuqizimin e çdo vendimi për përjashtim të deputetëve të grupit parlamentar.

2. Të gjithë demokratët duhet te jenë të bashkuar nën një sigël të vetme të Partisë Demokratike.

3. Vota e lirë e çdo demokrati është baza për zhvillimin dhe forcimin e Partisë Demokratike.

Ky është qëndrimi im përballë demokratëve, çdo kërkesë përjashtuese ndaj çdo demokrati thellon krizën ndërkohë që sot është koha vetëm për bashkim rreth vlerave të demokratëve/Zef Hila/