Debat te Integrimi, PD: Përjashtuat opozitën, PS: Hera e fundit…

Pas akuzave të Partisë Demokratike se opozita u la jashtë mbledhjes së Këshillit të Stabilizim Asociimit, debati ka vijuar edhe sot në një përplasje mes deputetëve në mbledhjen e Komisionit të Integrimit. Kryetari i Komisionit, Genc Pollo, u shpreh se qeveria prishi traditën duke lënë jashtë opozitën. Deputetët e PD-së, Jorida Tabaku dhe Aldo Bumçi, ngritën shqetësimin e përjashtimit të opozitës nga angazhimet ndërkombëtare.  Deputeti i PS-së, Blendi Çuçi tha se kjo duhet të jetë hera e fundit që devijohet nga rrjedha normale e diskutimit.

Debatet:

Pollo: U prish tradita e mirë në mbledhjen e Këshillit të Stabilizim Asociimit. Kërkojmë angazhime që kjo të jetë detyruese.

Çuçi: Të mos dalim nga rëndi i ditës. Në fund merremi me çështje jashtë rendit të ditës.

Tabaku: PD ndoqi me shqetësim faktin që opozita nuk u përfaqësua në Komisionin e Stabilizim Asociimit. Në procesin e Integrimit nuk ka pronarë. Ne kemi përfshirë gjithmonë opozitën. Ajo që ndodhi javën e kaluar ishte e paprecedentë për të shuar zërin e opozitës në Bruksel. Kërkojmë shpjegime nga kryeministri dhe ministri i Jashtëm për këtë çështje. Nuk doni që droga e krimi të bëhen objekt diskutimi në tryezat ndërkombëtarëve. Në këtë proces nuk ka përfitues politik.

Çuçi: Të jetë hera e fundit që devijojmë nga rrjedha normale. Ka qenë traditë e mirë pjesëmarrja e opozitës, por fakti që nuk erdhi asnjë kësaj radhe, ishte sepse nuk qe asnjë nga Parlamenti, por vetëm ministri i Jashtëm. Le t’i kërkojmë atij informacion se pse përdorën këtë format.

Bumçi: PD i ka themeluar këto tradita të mira. Ne ja dhamë opozitës të drejtën e pjesëmarrjes në këto formate. Ne e ftuam Bushatin si përfaqësues i opozitës në vitin 2011 të vinte në tryezë. Është për të ardhur keq që vetë ai ja heqë këtë të drejtë opozitës.