Idrizi tregon arsyet e përplasjeve me Ramën

Kryetari i PDIU-së, Shpëtim Idrizi, tashmë pjesë e koalicionit opozitar, ka treguar në studion e Mustafa Nanos, se përse u largua nga aleanca me kryeministrin Edi Rama.

Sipas tij, bëhet fjalë për një zgjedhje të detyruar pas asaj që ndodhi me PDIU-në në zgjedhjet e kaluara dhe ndryshimi i kursit të Ramës për Çështjen Çame dhe Greqinë.

Ai thotë se Rilindja i mori mandatet, duke vërtetuar akuzat e opozitës, se zgjedhjet e 2017 u blenë nga qeveria.

“Ka qenë zgjedhje e detyruar, pasi ajo që ndodhi me PDIU erdhi për shkak të asaj që ndodhi në zgjedhjet e kaluara dhe ndryshimi me 360 gradë i Ramës për çështjen çame. Sulmi u bë me mandatin e Fierit dhe Tiranës. Ajo që ndodhi me PDIU dhe Rilindjen u godit me kursin 360 gradë të çështjes çame. Rama ndryshoi kursin me Greqinë. U bë ligji i turpshëm për toponimet sepse 800 pleq që kanë lindur në Çamëri përfshirë edhe babain tim duhet të ndryshojmë emrin. Ky ndryshim i kursit shpjegon dhe goditjen që na u bë në zgjedhje. Rilindja na sulmoi, na mori mandatet, çështjen çame na mori edhe ato pak që ishin në administratë dhe ne dolëm në opozitë”.