KE prezanton sot progres raportet për vendet kandidate në BE. Zbardhet dokumenti, çfarë parashikohet për Shqipërinë

Komisioni Evropian prezanton sot Raportet e Progresit për vendet e zgjerimit. Paketa e zgjerimit, që përfshin edhe raportet vjetore të progresit për vendet në këtë proces, do të prezantohen para deputetëve të Parlamentit Evropian, nga komisioneri për zgjerim i BE-së Oliver Varhelyi.

Këshilli Evropian në progres raportin për negociatat në vendin tonë shprehet se Shqipëria ka bërë progres duke përmbushur kushtet e vendosura.

“Këshilli ngarkoi Komisionin të raportonte mbi një numër çështjesh që do të trajtoheshin nga Shqipëria para Konferencës së parë Ndërqeveritare mbi negociatat e pranimit.

Në përgjithësi, dhe pavarësisht sfidave të paraqitura nga pandemia COVID-19, Shqipëria ka vazhduar të tregojë përkushtimin e saj ndaj reformave të orientuara drejt BE-së dhe ka dhënë rezultate të prekshme dhe të qëndrueshme. Ajo ka plotësuar të gjitha kushtet e përcaktuara në Konkluzionet e Këshillit të Marsit 2020 për Konferencën e parë Ndërqeveritare”, thuhet në progres raport.