Kosova, pjesë e Kartës së Adriatikut, ambasadori serb ikën nga takimi

Një incident diplomatik ka ndodhur ditën e sotme në takimin e Kartës së Adriatikut që po zhvillohet në Tiranë. Në forumin rajonal ku bëjnë pjesë vendet e rajonit, ministri i Jashtëm i Shqipërisë, Ditmir Bushati ka kërkuar që në takim të ishte dhe Kosova, si vend vëzhgues, i cili do të bëhet më pas anëtar. Kjo kërkesë e diplomatit shqiptar nuk është pritur mirë nga ambasadori i Serbisë në Tiranë, Miroljub Zariq, i cili në mënyrë demonstrative është larguar nga takimi.

Kërkesa e Bushatit nuk është pritur mirë dhe nga Bosnje Hercegovina, përfaqësuesi i së cilës e ka refuzuar hyrjen e Kosovës si vend anëtar.  “Unë jam mandatuar për të përfaqësuar interesat e Shqipërisë dhe jo Serbisë. Ne si Shqipëria do të dëshironim gjithpërfshirje dhe bashkëpunim. Samiti konsiderohet paradhomë për përfshirjen e vendeve në NATO dhe garanton bashkëpunim në çështjen e sigurisë në rajon”,- tha Bushati i pyetur lidhur me largimin e ambasadorit serb. 

Karta e Adriatikut përbëhet nga pesw shtete: SHBA, Shqipëria, Bosnjë-Hercegovina, Kroacia, Mali i Zi dhe Maqedonia. Serbia dhe Kosova pritet të ishin prezentë si vëzhguese.