Kryemadhi takim me gjimnazistët në Tiranë: LSI do të dyfishojë buxhetin për arsimin

Kryetarja e LSI, Monika Kryemadhi ka zhvilluar sot një takim me një grup gjimnazistësh në Tiranë. Me të rinjtë, kryetarja e LSI ka diskutuar për problemet me të cilat përballet sot rinia, si dhe ka shpjeguar pikat e programit të LSI për rininë.

“Sot u takova me një grup gjimnazistësh nga shkollat ‘Qemal Stafa’ dhe ‘Sinan Tafaj’. E jashtëzakonshme energjia e tyre pozitive dhe dëshira për ta parë Shqipërinë si shtëpinë tonë të përbashkët. Dështimi më i madh i kësaj qeverie është lënia e rinisë pas dore. Largimi i tyre nga vendi, vrasja e shpresës dhe ëndrrave të tyre është plaga më e madhe që politika e mbrapshtë i ka shkaktuar Shqipërisë. Rinia është themeli i programit të LSI. Ne nuk do t’i zhgënjejmë të rinjtë. LSI do të dyfishojë buxhetin për arsimin. Një rini e mirëarsimuar dhe punësimi i saj është garancia e vetme për një Shqipëri që nuk plaket! Ne duhet ta bëjmë Shqipërinë shtëpi për rininë tonë”, shkruan në Facebook Monika Kryemadhi.