Lea Ypi: “Mbështesim protestat, ndalni dhunën ndaj qytetarëve”

Njëmbëdhjetë organizata dhe shoqata shqiptare me veprimtari në Mbretërinë e Bashkuar kanë publikuar një letër të hapur drejtuar Qeverisë dhe Kuvendit të Shqipërisë, ku shprehin mbështetjen e tyre për protestat qytetare që po zhvillohen prej më shumë se një muaji në vend. Në reagimin e tyre, ato kërkojnë që të ndalet çdo formë dhune ndaj protestuesve paqësorë dhe u bëjnë thirrje institucioneve të respektojnë të drejtat demokratike të qytetarëve.

Letrës i është bashkuar edhe shkrimtarja dhe akademikja Lea Ypi, e cila e ka shpërndarë publikisht në rrjetet sociale. Sipas organizatave firmëtare, protestat përfaqësojnë një shoqëri civile më të ndërgjegjshme dhe më aktive, duke qenë një shprehje legjitime e demokracisë dhe e së drejtës së qytetarëve për të kërkuar transparencë dhe llogaridhënie nga institucionet.

Në letër theksohet se në protesta marrin pjesë qytetarë të shtresave të ndryshme, përfshirë të rinj, prindër, profesionistë dhe studiues, të cilët janë angazhuar për mbrojtjen e pasurive natyrore, hapësirave publike dhe interesit të përgjithshëm. Organizatat dënojnë çdo akt dhune, frikësimi apo presioni ndaj protestuesve, duke kërkuar që autoritetet të garantojnë zhvillimin paqësor të tubimeve.

Në dokument paraqiten edhe katër kërkesa kryesore drejtuar institucioneve shqiptare. Ato kërkojnë transparencë të plotë për ligjet, vendimet dhe kontratat që lidhen me mjedisin dhe pasuritë natyrore, si edhe llogaridhënie për çdo proces që ka të bëjë me shitjen apo dhënien me koncesion të pasurive publike, duke theksuar rëndësinë e konsultimit publik dhe mbikëqyrjes parlamentare.

Gjithashtu, organizatat kërkojnë që interesi publik të mbetet parimi kryesor në politikat e zhvillimit ekonomik dhe që qeveria të nisë një dialog të hapur e konstruktiv me përfaqësuesit e shoqërisë civile dhe protestuesit, me synimin për të adresuar shqetësimet e ngritura nga qytetarët.

Letra është firmosur nga 11 organizata shqiptare që veprojnë në Mbretërinë e Bashkuar, të cilat shprehen se mbështesin zgjidhjen e mosmarrëveshjeve përmes dialogut, respektimit të ligjit dhe standardeve demokratike.