Padi penale dhe ankesë për gjyqtarin Zhukrin në ILD nga grupi Basha

Grupi Basha në PD, ka dorëzuar sot në Inspektorin e Lartë të Drejtësisë edhe një ankesë për procedim disiplinor për gjyqtarin Agron Zhukri, përpos paralajmërimit për padi penale. Ankesa është dorëzuar nga sekretari i Përgjithshëm Gazment Bardhi. Kurse përmes një njoftimi, ILD-ja thotë se ka pranuar ankesën e PD-së.

Përfaqësuesi ligjor i Komisionit të Rithemelimit, Ivi Kaso tha se Gjykata e Tiranës ka marrë vendimin për të njohur grupin e Rithemelimit si organin drejtues të PD-së.

Vendimi u dha nga gjyqtari Agron Zhukri, duke i hapur kështu rrugë marrjes së drejtimit të Partisë Demokratike nga 29 anëtarët e Komisionit të Rithemelimit, i cili përmes votës së 4935 delegatëve në Kuvendin e 11 Dhjetorit shkarkoi nga postet drejtuese Lulzim Bashën, nënkryetarët, Sekretarin e Përgjithshëm dhe Kryesinë.

Me regjistrimin në Gjykatë të statutit të 11 Dhjetorit, Gjykata i njohu Komisionit të Rithemelimit të drejtën e rikthimit në selinë e Partisë Demokratike, si dhe vulën e simbolet e reja të miratuara në Kuvendin e tyre.