Paloka: Dilema e Saimir Tahirit, të shijojë milionat e drogës apo…

Nënkryetari i PD-së Edi Paloka akuzon strukurat e shtetit për përfshirje në trafikun e drogës. Përmes një statusi në “Facebook”, Paloka ka theksuar me ironi se ish-ministri i Brendshëm, Saimir Tahiri, gjendet në dilemë, sa i takon kthimit në politikë. Sipas Palokës, Tahiri e përjeton një situatë të tillë me veten pasi i gjendet si opsion edhe shijimi i milionave të drogës.

Postimi i Palokës

Nuk kanë limite as në krim, as në poshtërsi e as në pafytyrësi.

Tahiri, ish-ministër i Brendshëm, i lirë, është në dilemë; të rikthehet në politikë sa për “kunj” apo thjesht të shijojë milionat e drogës.

Xhafaj, ministër i Brendshëm i hakërrehet opozitës sa herë i përmendet vëllai trafikant apo shoferi i vrarë.

Ish-kupola e policisë “që donim” është prej më shumë se një viti në “kërkim”.

Ndërkohë, tonelatat e drogës vazhdojnë rrugën drejt Evropës. Vrasje, grabitje, rrëmbime, gjoba, aksidente e dhunë janë lajmet e përditshme për shqiptarët.

Shqipëria çdo ditë e më shumë po cilësohet jo vetëm si qendër e krimit të organizuar, por dhe si eksportuesja më e madhe e krimit në Evropë.

Po të pafytyrët nuk i pengon kjo, që të nxjerrin drejtorët çdo ditë në konferenca, të organizojnë dhe aktivitete speciale ku ftojnë “çiftin diplomatik” të flasë për sukseset e mëdha të operacionit “Forca e ligjit”, i cili ka shkatërruar “bandat” e fëmijëve që shisnin cigare në rrugë apo “kriminelë” që qarkullonin të dehur me biçikleta duke rrezikuar seriozisht qytetarët…

Po s’ka problem se “më keq do bëhet…”