Paloka: Përgjimi që implikon Vangjush Dakon

Partia Demokratike deklaron se ekziston një përgjim që provon implikimin e Vangjush Dakos në afera me personazhe të botës së krimit. Deputeti Edi Paloka doli sot në një konferencë ku deklaroi se përgjimi është në duart e Prokurorisë së Krimeve të Rënda.

“Modeli dhe formula provohen nga përgjimi që disponon Prokuroria e Krimeve të Rënda, ku Vangjush Dako është regjistruar gjatë zgjedhjeve, duke u premtuar tendera kriminelëve më të rrezikshëm të Durrësit në këmbim të blerjes së votave”,- tha Paloka.

Deputeti i PD-së shtoi se Edi Rama nuk po flet për këtë çështje duke shpresuar që ta zgjidh me Prokurorin e ri që do të emërojë.

Deklarata e plotë e Edi Palokës:

“Në Durrës politika dhe krimi janë bërë një.

Këtë model Edi Rama e ka ngritur kudo njësoj – në Durrës, Elbasan, Tiranë.

Formula është “përdor krimin dhe paratë për të marrë zgjedhjet. Më pas, me pushtetin e fituar pasurohu për vete pasuro dhe krimin”.

Modeli dhe formula provohen nga përgjimi që disponon Prokuroria e Krimeve të Rënda, ku Vangjush Dako është regjistruar gjatë zgjedhjeve, duke u premtuar tendera kriminelëve më të rrezikshëm të Durrësit në këmbim të blerjes së votave.

Por Edi Rama dhe Vangjush Dako nuk u japin asnjë shpjegim shqiptarëve. Qëllimi i tyre është të heshtin derisa të kapin plotësisht Prokurorinë.

Marrja nën kontroll e prokurorisë dhe sistemit të drejtësisë e bën Vangjush Dakon të ndjehet i paprekshëm. Edi Rama po e trajton Kryetarin e Bashkisë së Durrësit njësoj si Saimir Tahirin. Po i jep mbrojtje politike nga drejtësia, sepse gjithçka dhe të gjithë lidhen me Edi Ramën.

Me Edi Ramën lidhet krimi nëpërmjet Saimir Tahirit, Qazim Sejdinit, Vangjush Dakos, Agron Xhafajt. Drejtësia do të jetë e pafuqishme ndaj tyre derisa në krye të qeverisë të jetë Edi Rama. Vetëm me largimin e Edi Ramës do të ketë garanci për luftën kundër krimit të organizuar”.