PDIU: Është e vërtetë që nuk ka çamë në Dibër, por ne fituam

Partia Drejtësi, Integrim dhe Unitet ka përshëndetur fitoren e kandidatit të majtë në Dibër, Muharrem Rama. Në deklaratën e PDIU thuhet se “Është e vërtetë që nuk ka shqiptarë të Çamërisë në Dibër, por ka PDIU, sepse ka dibranë patriotë që e duan Shqipërinë dhe kombin shqiptar”.

Deklarata e plotë e PDIU:

“Partia Drejtësi, Integrim dhe Unitet uron fituesin e garës për kryetar të Bashkisë së Dibrës, z. Muharrem Rama. Fitorja e Aleancës për Shqipërinë Evropiane është një fitore për Dibrën dhe dibranët. Po ashtu, fitorja është përgjigja më e mirë ndaj sulmit të paprecedent njëmujor, jo vetëm nga kundërshtari politik, por dhe turlifarlloj pseudosnalistësh, të cilët, në kufijtë e racizmit etiketuan degën e PDIU me epitete si çamët e Dibrës, etj.

Është e vërtetë që nuk ka shqiptarë të Çamërisë në Dibër, por ka PDIU, sepse ka dibranë patriotë që e duan Shqipërinë dhe kombin shqiptar. Prandaj, urojmë z. Rama, ASHE-në dhe degën e PDIU-së në Dibër dhe, veçanërisht, shprehim mirënjohjen për dibranët, për mbështetjen që i japin PDIU-së, larg barrierave antikombëtare krahinore, që  pseudoanalistë me frymëzime partiake duan të fryjnë në dëm të dobisë kombëtare”.