Rama për Berishën: Edhe familja e Presidentit Trump e përgënjeshtroi

Kryeministri Edi Rama reagoi sot ndaj disa pretendimeve të shpërndara nga Partia Demokratike. Ai i cilësoi si “marrëzitë e bufit” akuzat që lidhen me një takim të supozuar mes tij dhe Donald Trump Jr., një ngjarje që sipas PD-së ishte organizuar me ndihmën e Richard Grenell.

Rama tha se këto lajme të rreme, të përhapura nga zyra e shtypit e Partisë Demokratike, ishin aq të pabaza sa që detyruan vetë Trump Jr. dhe Grenell të dalin publikisht për t’i përgënjeshtruar.

“E dëgjuat vetë se deri ku ka shkuar absurdi, zëdhënësi i ‘bufit’ tha që unë paskam dështuar të shkoj në Beograd për të takuar Vuçiçin, dhe që gjoja aty do të bëja sikur takoja rastësisht djalin e Trumpit në ndonjë cep të kuzhinës,” tha Rama me ironi. “Arritëm në pikën që edhe familja e një presidenti amerikan të detyrohet të reagojë ndaj këtyre shpifjeve. E kuptoni në çfarë niveli është zhytur opozita, nën udhëheqjen e një njeriu që flet përçartë në moshën 80 e kusur?”, tha Rama.