Vr*sja e ndërtuesit në Vlorë, PD: Nurihan Meta të japë dorëheqjen si anëtare e KLP-së

Partia Demokratike kërkon largimin e menjëhershëm nga detyra të anëtares së KLP-së, Nurihan Meta, pas krimit të ndodhur dje në Vlorë, me autor djalin e saj, 33-vjeçarin Rei Meta. Përmes një deklarate për shtyp, zëdhënësja e PD-së, Mirela Karabina u shpreh se Meta është pengesë për hetimin për shkak të konfliktit të interesit.

“Për shkak të dhunës të ushtruar nga shtetasi Rei Meta, djali i anëtares së Këshillit të Lartë të Prokurorisë, Nurihan Meta, humbi jetën shtetasi Armando Meshau; si dhe faktet e bëra publike nga hetimet paraprake, të cilat dëshmojnë se djali i anëtares së KLP-së vepronte si sekser duke përdorur emrin dhe prestigjin e postit të së ëmës, kërkojmë një hetim të thelluar jo vetëm të krimit të kryer nga Rei Meta, por edhe të këtyre akuzave publike që sot rëndojnë mbi Nurihan Meta”, u shpreh Karabina.

Partia Demokratike i bëri thirrje Nurihan Metës të japë dorëheqjen për t’i hapur rrugën drejtësisë. Karabina u shpreh se “Partia Demokratike mbështet prokurorinë për një hetim të gjithëanshëm të kësaj ngjarje të rëndë në të cilën humbi jetën Armando Meshau”.