Një konflikt i nisur në rrjetet sociale përfundoi në një pritë të organizuar pranë mbikalimit të Rinasit, ku Eduard Kuçi u rrethua dhe u dhunua nga Jozefin Marku dhe disa persona të tjerë.
Pamjet tregojnë se Kuçit iu ndalua makina nga persona që përdornin një tabelë “Stop Policia”. Pasi zbriti nga automjeti, ai u rrethua, u mbajt mbi kofanon e një makine, u godit dhe u detyrua të kërkonte falje. Në video shfaqen edhe veprime poshtëruese me natyrë seksuale.
Kuçi e denoncoi ngjarjen si një pritë të organizuar, ndërsa Marku pretendoi se gjithçka ishte “aktrim”. Megjithatë, rasti ka vënë në lëvizje autoritetet në Shqipëri dhe Kosovë.
Prokuroria e Pejës ka hapur një rast penal për “lëndim të lehtë trupor”, ndërsa Policia e Tiranës ka shoqëruar Markun dhe një person tjetër që shfaqet në video.
Hetuesit kanë sekuestruar pamjet e kamerave të sigurisë dhe po punojnë për identifikimin e personave të tjerë të përfshirë. Marku është lënë i lirë pas marrjes në pyetje.
