5 ditë nga operimi, Marquez gati të garojë

E vetmja gjë që mungon në karrierën e Marc Marquez është një rikthim legjendar nga dëmtimi. Piloti spanjoll i MotoGP, është gati ta realizojë vetëm 5 ditë pas operimit të krahut të djathë.

6 herë kampioni i botës u aksidentua të dielën e kaluar, u operua ditën e martë dhe ditën e mërkurë u rikthye në shtëpi, kurse mëngjesin e kësaj të enjte erdhi dhe lajmi i pabesueshëm. ”Pas operacionit të suksesshëm të së martës, Marc Marquez rikthehet në Jerez”.

Faktori kyç i rikthimit të Marquez lidhet me faktin që fraktura nuk ka prekur nervin radial të krahut, çka e bën rekuperimin e dëmtimit shumë më të lehtë. Spanjolli u shfaq ndërsa u kthye nga operimi me krahun të fashuar dhe paraprakisht u mendua për një ndalesë të paktën 2-mujore të pilotit. Shumë prej mbështetësve të tij i tremben një rikthimi kaq të shpejtë, pasi një tjetër rrëzim mund t’i kushtojë sezonin spanjollit.