Vllaznia e mbyll në krye, shpëton Tirana, bie Bylisi

Luhet java e fundit e Abissnet Superiore, me verdikte dramatike si në garën për titull, ashtu edhe në luftën për mbijetesë. Vllaznia e mbylli kampionatin në vendin e parë, pasi triumfoi 2-0 ndaj Flamurtarit, skuadër që kishte vulosur më herët rënien në Kategorinë e Parë.

Katër skuadrat që do të luftojnë për titullin në “Final Four” janë Vllaznia, Elbasani, Egnatia dhe Dinamo City.

Në Elbasan Arena, Tirana mori një fitore jetike 3-1 ndaj Elbasanit, duke siguruar mbijetesën në elitë. Golat për bardheblutë u realizuan nga Patrik Myslovic, Rimal Haxhiu dhe Tabeku, ndërsa për vendasit realizoi Arsen Kasa.

Ndërkohë, në Niko Dovana Stadium, Teuta mposhti 3-2 Egnatian, por pavarësisht triumfit, durrsakët e mbyllën sezonin në vendin e tetë dhe do të luajnë në “play-out” për të siguruar qëndrimin në Superiore.

Drama më e madhe u regjistrua në sfidën direkte të mbijetesës, ku Vora shkatërroi 5-2 Bylis dhe siguroi qëndrimin në elitë edhe për sezonin e ardhshëm. Me këtë humbje, Bylisi bie zyrtarisht në Kategorinë e Parë, duke iu bashkuar Flamurtarit.

Në kryeqytet, derbi i luajtur në Arena e Demave u fitua 2-1 nga Partizani ndaj Dinamos, në një duel prestigji në javën e fundit të kampionatit.